Արցախն ապացուցեց, որ դավաճաններն այնտեղ տեղ չունեն, հերթը Հայաստանինն է. Աննա Մկրտչյան

Երբ այս ԱԺ-ն նոր էր ձեւավորվել, մենք պնդում էինք, որ շատ կարեւոր է, որ ԱԺ-ն ունենա Արցախի հարցերով զբաղվող մշտական հանձնաժողով: Այս մասին, այսօր՝ սեպտեմբերի 12-ին, ԱԺ հայտարարութունների ժամին ասաց «Պատիվ ունեմ» խմբակցության պատգամավոր Աննա Մկրտչյանը:

«Մենք այդ ժամանակ էլ շատ լավ գիտեինք, որ Արցախը ծախված էր, իսկ Հայաստանը՝ դավաճանված: Դրա ապացույցներն իրենց երկար սպասեցնել չտվեցին: Նիկոլից սկսած որեւէ  մեկը այդ պահից հետո Արցախ չգնաց: Արցախ բառից իսպառ հրաժարվել են, չենք գտնի մեկին, որը կասի «Արցախի Հանրապետություն» բառերը: Հրաժարվել են Արցախից՝ այն ժանաչելով Ադրբեջանինը:

Սիրելի հայրենակիցներ, դուք հիմա շատ լավ հասկացաք՝ ինչի՞ մասին էր 2018 թվականը, այն թավշյա կապիտուլյացիայի ու թավշյա դավաճանության մասին էր: Իսկ դրա շարունակությունն էլ այն է, որ մեզ մորթազերծ անողի հանդեպ պետք է թշնամանքը սկսեին կառավարել, արդեն սկսել են: Երեկ իրենց կառավարչի` Էրդողանի հետ զրույց են ունեցել»,- ասաց նԱննա Մկրտչյանը:

Նրա խոսքով` հայ ժողովրդի իրականությունն ուղղակի ողբերգական է. «Երկիրը քայքայել են, ծաղրուծանակի առարկա են դարձրել եւ Հայաստանի պատմության մեջ առաջին անգամ հետեւում ենք, թե ինչպես է աղերսվում Ալիեւի հետ հանդիպումը ու նրան բացատրություններ տալու հնարավորությունը: Իսկ այդ վարքագծի լավագույն գնահատականը տվել է Իրանի նախագահը՝ ասելով, որ կասկածելի վարքագիծն է այս բարդությունների պատճառը»,-ասաց ընդդիմադիր պատգամավորը:

Ընդդիմադիր պատգամավորը հայտարարեց, որ Արցախն ապացուցել է՝ ամուր է ու չի ընկրկելու. «Արցախն ապացուցեց, որ դավաճաններն այնտեղ տեղ չունեն, հերթը մերն է, հերթը Հայաստանինն է»,- հավելեց Մկրտչյանը: