ՔՊ-ն հաղթելու մեկ հնարավորություն ունի, և պետք է զրկել այդ շանսից

Երևանի ավագանու ընտրություններում Նիկոլ Փաշինյանի «Քաղաքացիական պայմանագիրը», հաղթանակի հիպոթետիկ մեկ հնարավորություն ունի, եթե ընտրություններին մասնակցեն 40 %-ից պակաս ընտրողներ։ Տևական ժամանակ հասարակական տարբեր խմբեր, վերլուծաբաններ, քաղաքագետներ փորձում են հասարակությանը բացատրել, որ ցածր մասնակցությունն է բացառապես «Քաղաքացիական պայմանագրի» հաջողության գրավականը։

Ի դեպ, գործող վարչախումբն ինքն էլ ամեն ինչ անում է ընտրությունների մասնակցությունը նվազեցնելու, հանրությանը հիասթափեցնելու և հուսահատության ալիքի վրա ընտրությունների մասնակիցների թիվը պակասեցնելու ուղղությամբ։ Ամեն դեպքում նույնիսկ նախկին ընտրությունների փորձը վկայում է, որ այս հանգամանքը չափազանց բարդ է տրվելու գործող իշխանություններին։

44-օրյա պատերազմից հետո, երբ երկրում ավելի խորացվեց հուսահատության մթնոլորտը, համապետական մեկ մեծ ընտրություն է կայացել՝ 2021 թվականի խորհրդարանական արտահերթ ընտրությունները։ Ողջ հանրապետության մասշտաբով ընտրությունների մասնակցության թիվը կազմել է 49,39 % , իսկ Երևանում այդ թիվն ավելի բարձր է եղել՝ 51,55 %, ընդ որում նույնիսկ այդ ընտրություններում մարզերի կտրվածքով Երևանում ընդդիմադիր ամենախոշոր միավորման՝ «Հայաստան» դաշինքի և Փաշինյանի գլխավորած «Քաղաքացիական պայմանագրի» տարբերությունն ամենապակասն է եղել, այժմ արդեն իշխանությունն ավելի մեծ վարկանիշային և իմիջային կորուստներ է կրել, և առնվազն անհնար է լինելու իրականացնել իրենց մտահաղացումը։

Իհարկե իշխանությունն ամեն կերպով զավթած պահելու և կրկին վերարտադրվելու համար, Փաշինյանն ու նրա թեկնածուն գնալու են տարբեր տեսակի հնարքներ գործադրելու, վարչական ռեսուրսից ու ընտրակեղծիքներից, տոտալ ահաբեկումներից և պետական աշխատողներին վախեցնելուց բացի նաև փորձելու են այնպես անել, որպեսզի իրենց ընդդիմախոսները չներկայանան ընտրատեղամասեր, իսկ ինքը՝ իշխանությունը, իր բոլոր ընտրողներին գրեթե դեմքով գիտի և նրանց մեկառմեկ, անհրաժեշտության դեպքում, նույնիսկ լիմուզինով կտեղափոխի ընտրատեղամասեր, միայն թե մեկ ձայն ավել ստանա։

Ի՞նչ պետք է անի այս պարագայում ընդդիմությունը և ընդդիմադիր տրամադրված ընտրողը, միանշանակ, հնարավորինս գնա ընտրատեղամասեր, դեմ քվեարկի «Քաղաքացիական պայմանագրին» և նրա արբանյակ կուսակցություններին։

Արմինե Գալստյան