Փաշինյանի հուսահատ զանգերը և ժամ առ ժամ սրացող ճգնաժամը
ՎԵՐԼՈՒԾՈՒԹՅՈՒՆՆԵՐ
Հայաստանի և Ադրբեջանի հարաբերությունները սրվում են արդեն ոչ թե օրեցօր, այլ ժամ առ ժամ։ Գործող իշխանությունները փորձում են կանխել հնարավոր պատերազմը, իսկ նախօրեին Նիկոլ Փաշինյանի արած հեռախոսազանգերն ու միջազգային արձագանքները վկայում են, որ Հայաստանը հերթական անգամ մենակ է մնացել ողջ աշխարհում։ Նախօրեին Փաշինյանը միանգամից 5 հեռախոսազրույց է ունեցել, մասնավորապես զանգել է Միացյալ Նահանգների պետքարտուղար Էնթոնի Բլինքենին, ընդգծել բոլոր հարցերը բացառապես դիվանագիտական ճանապարհով ու կառուցողական մթնոլորտում կարգավորելու մոտեցումներին։ Փաշինյանը շեշտել է, որ այդ նպատակով պատրաստ է հրատապ քննարկումներ ունենալ Ադրբեջանի նախագահի հետ։
Հեռախոսազրույց է եղել նաև Նիկոլ Փաշինյանի և Ֆրանսիայի նախագահ Էմանուել Մակրոնի միջև, Փաշինյանի և Գերմանիայի կանցլեր Օլաֆ Շոլցի, Վրաստանի վարչապետ Իրաքլի Ղարիբաշվիլիի, ինչպես նաև Իրանի նախագահ Էբրահիմ Ռայիսիի հետ։ Բոլոր հանդիպումների վերաբերյալ նույնանման հաղորդագրություններ են տարածվել, որտեղ Փաշինյանն իր պատրաստակամությունն է հայտնում հրատապ քննարկումներ ունենալ Ադրբեջանի նախագահի հետ։
Ադրբեջանի նախագահի օգնական Հիքմեթ Հաջիևը հայտարարել է, թե որևէ հրատապ քննարկում անցկացնելու առաջարկ դեռ պաշտոնապես չեն ստացել։ Ի դեպ այս զանգերից հետո, չափազանց ուշագրավ է Իրանի նախագահականի արձագանքը։ Ռայիսիի քաղաքական հարցերով տեղակալ Մուհամադ Ջամշիդին հայտնել է, թե Իրանի նախագահն իր խոսքում նշել է, որ աշխարհաքաղաքական կամ սահմանային փոփոխությունների ցանկացած քայլ կարմիր գիծ է։ «Երեք գումարած երեք» ձևաչափից դուրս օտարերկրացիների հրավիրելը համատեղ զորավարժութունների և կասկածելի այցերը բարդացնում են իրավիճակը և Իրանը պատրաստ է աջակցելու երկու կողմերին լուծել տարաձայնությունները։
Իրանական կողմի այս ակնարկը վերաբերում է հայ–ամերիկյան զորավարժություններին, որոնք մեկնարկելու են Հայաստանում և արդեն իսկ հարուցել են ոչ միայն Իրանի, այլ նաև Ռուսաստանի բուռն զայրույթը։ Հանդիպումների վերաբերյալ հայտարարություն են տարածել նաև Միացյալ Նահանգների պետքարտուղարությունը, նշել, թե Միացյալ Նահանգները խորապես մտահոգված են Լեռնային Ղարաբաղում արագորեն վատթարացող հումանիտար իրավիճակով։
Պետքարտուղար Բլինքենը հայտնել է, որ մարդասիրական օգնություններով բեռները գտնվում են ինչպես, Լաչինի այնպես էլ Աղդամի երթուղիների վրա և կոչ է անում անմիջապես և անհապաղ և միաժամանակ բացել երկու միջանցքները՝ թույլ տալով անհրաժեշտ մարդասիրական մատակարարումները Լեռնային Ղարաբաղի բնակչությանը։ Եթե այլ իրավիճակում ԱՄՆ-ն և Արևմուտքը նշում էին, որ Լաչինի միջանցքն առանցքային է, ապա այժմ պետքարտուղարի արձագանքից կարելի է տեսնել, որ հավասարության նշան է դրվում երկու ճանապարհների միջև։
Նարինե Անտոնյան
