Կշնորհավորի՞ Փաշինյանն Արցախի նորընտիր նախագահին

Արցախի Հանրապետության Ազգային ժողովն այսօր ընտրեց երկրի նոր նախագահին: Այսպիսով, օրերս պետնախարար նշանակված Սամվել Շահրամանյանն ընտրվեց Արցախի նախագահ:

Հետաքրքիր է, ՀՀ իշխանությունը՝ ի դեմս վարչապետ Նիկոլ Փաշինյանի և նախագահ Վահագն Խաչատուրյանի կշնորհավորի՞ հայկական երկրորդ պետության նոր նախագահին ընտրվելու կապակցությամբ:

2020 թվականին, երբ Արայիկ Հարությունյանն ընտրվեց, Հայաստանում և Արցախում կորոնավիրուսի պանդեմիան էր մոլեգնում, սահմանը փակ էր, բայց անգամ դա չխանգարեց, որ Փաշինյանը շքախմբով մեկնի Արցախ ու անձամբ ներկա գտնվի Հարությունյանի երդմնակալության արարողությանը: Հետո նրանք միասին “դիրիժորություն արեցին” արյունալի 44-օրյա պատերամզը և ո՛չ մեկը, ո՛չ էլ մյուսը հրաժարական չտվեցին, որևէ պատասխանատվություն չկրելով այն ամենի համար, ինչ տեղի ունեցավ: 

Արայիկ Հարությունյանը հեռացավ՝ թողնելով Արցախը ծանրագույն մի իրավիճակում ու հենց Փաշինյանի պատճառով, ով մեկ տարի առաջ ճանաչեց Արցախը Ադրբեջանի մաս: Դա սկիզբ դրեց տոտալ շրջափակմանը, որի հետևանքով տառապում է ու սովամահության, ցեղասպանվելու սպառնալիքի սրի տակ ապրում է 120 000 արցախցի:

Եվ կրկին նույն հարցադրումը՝ կշնորհավորի՞ Փաշինյանը Շահրամանյանին: Այն Փաշինյանը, ով նախ հայտարարեց, թե Արցախը Հայաստան է և վերջ, ապա հայտարարեց, որ ճանաչում է Ադրբեջանի տարածքային ամբողջականությունն ու Արցախը թշնամի երկրի կազմում: Այն Փաշինյանը, որը 2020 թվականի ողբերգական ու մինչ օրս, ըստ էության, չավարտվող պատերազմից հետո որևէ անգամ Արցախ չմեկնեց: Պատասխանն ակնհայտ է...