Բաքուն պնդում է, որ Հայաստանը ցանկանում է պահպանել անջատողականությունը Ադրբեջանի տարածքում

Սեպտեմբերի 8-ին Ադրբեջանի արտաքին գործերի նախարարությունում երկրում հավատարմագրված դիվանագիտական ​​կորպուսի համար տեղի է ունեցել ճեպազրույց՝ ԱՀ արտգործնախարար Ջեյհուն Բայրամովի, ԱՀ նախագահի օգնական, նախագահի աշխատակազմի  արտաքին քաղաքականության բաժնի ղեկավար Հիքմեթ Հաջիևի և ԱՀ նախագահի հատուկ հանձնարարությունների գծով ներկայացուցիչ Էլչին Ամիրբեկովի մասնակցությամբ։

Երեք բարձրաստիճան պաշտոնյաները հայտարարել են, որ «Հայաստանի ներկայիս դիրքորոշումը ոչնչով չի տարբերվում հայկական կողմի 30 տարվա վարած քաղաքականությունից, որի նպատակն է խզել պայմանավորվածությունները, չկատարել ստանձնած պարտավորությունները և զբաղվել բանակցությունների սիմուլյացիայով»։

Ըստ Բայրամովի, Հաջիևի և Ամիրբեկովի, Հայաստանը ցանկանում է «պահպանել անջատողականությունը Ադրբեջանի տարածքում բոլոր հնարավոր գաղափարական, քաղաքական, ռազմական, ֆինանսական և այլ միջոցներով և փորձում է ժամանակ շահել ու խուսափել իրական քայլերից, որոնք կարող են առաջընթաց ապահովել»։

Ադրբեջանական պաշտոնյաները ճեպազրույցում ասել են նաև, որ հայկական կողմը «ակտիվացրել է ռազմական սադրանքները և ռազմական շինարարական աշխատանքներ է իրականացնում ինչպես Ղարաբաղում, այնպես էլ պետական ​​անբաժանելի սահմանի երկայնքով»։

Ճեպազրույցում ադրբեջանցի քաղաքական գործիչները նաև սուր քննադատության են ենթարկել վաղը Արցախում նախատեսված նախագահական ընտրությունների անցկացումը։

«Այս, այսպես կոչված, «նախագահական ընտրությունները» չափազանց սադրիչ քայլ է։ «Ադրբեջանի ինքնիշխանության և տարածքային ամբողջականության նման բացահայտ խախտումը միանգամայն անընդունելի է»,- ընդգծել է ադրբեջանական կողմը։