«Փաստաբանը Հայաստանի համար ոչ մի պլյուս չի գտել ՄՔԴ-ին անդամակցելու հարցում»
ՎԵՐԼՈՒԾՈՒԹՅՈՒՆՆԵՐ
Regnum.ru-ն գրում է, որ Հայաստանը ոչինչ չի շահի Միջազգային քրեական դատարանի (ՄՔԴ) այսպես կոչված Հռոմի ստատուտի վավերացումից։ «Regnum» գործակալությանը տված հարցազրույցում նման կարծիք է հայտնել միջազգային իրավունքի իրավաբան Մարիա Յարմուշը։
Հիշեցնենք, որ Հայաստանի կառավարությունն Ազգային ժողով է ներկայացրել Միջազգային քրեական դատարանի Հռոմի կանոնադրությունը վավերացնելու մասին օրենքի նախագիծը։ Երկրի իշխանություններն իրենց որոշումը հիմնավորել են «Լեռնային Ղարաբաղի տարածքում Հայաստանի դեմ Ադրբեջանի ագրեսիայի և ռազմական հանցագործությունների» հարցը ՄՔԴ-ում բարձրացնելու հնարավորությամբ։ Ռուսաստանը չի աջակցում Հայաստանի այդ որոշմանը կապված նախագահ Վլադիմիր Պուտինի և երեխաների իրավունքների հանձնակատար Մարիա Լվովա-Բելովայի «ձերբակալման» վերաբերյալ ՄՔԴ-ի որոշման հետ։
«Հայաստանը, որը միշտ փորձել է հարաբերություններ պահպանել Ռուսաստանի հետ և չհակամարտել, հանկարծ սկսում է կարծես թե աջակցել ՄՔԴ-ի այդ անօրինական որոշմանը: Հասկանալի է, որ դա քաղաքականացված ոչ բարեկամական հարձակում է Ռուսաստանի դեմ»,- ասել է Յարմուշը։
Փաստաբանը հիշեցրել է, որ Հայաստանը Հռոմի ստատուտը ստորագրել է դեռ 1999 թվականին, բայց մինչ այսօր այն չի վավերացվել։ Յարմուշի խոսքով, եթե Երևանն այսքան ժամանակ չէր համարձակվում նման գործողություն ձեռնարկել, ապա չարժեր էլ սկսել, քանի որ դա կորուստներ է խոստանում։ «Ռուսաստանի դեմ այդ անհիմն և ոչ բարեկամական գործողությունը ոչնչի չի հանգեցնի, բացի նրանից, որ Հայաստանը կկորցնի իր ինքնիշխանությունն այն առումով, որ Երևանը պարտավորվելու է Հաագայի դատարանին հանձնել իր իրավասության տակ գտնվող անձանց։ Եվ չի բացառվում, որ դա հակառակ էֆեկտ տա, քանի որ եթե նրանք հիմա սկսեն լուծել Ադրբեջանի հետ հարցերն այդ քրեական դատարանում, ապա հնարավոր է, որ Բաքվի հասցեին հնչած մեղադրանքներն ուղղվեն հենց Երևանի վրա»,- հայտարարել է փաստաբանը։
Նա պարզաբանել է, որ Լեռնային Ղարաբաղի հակամարտության ժամանակ զինվորականների գործողությունների պատճառով երկու կողմերից էլ փոխադարձ մեղադրանքներ են հնչել։ Իսկ Երևանի Ադրբեջանի զինվորականների դեմ բողոքարկումն Արդարադատության միջազգային դատարան ցանկացած գործով կարող է հակառակ կողմում հարցեր առաջացնել: Բացի այդ, Յարմուշը փաստել է, որ Երևանի որոշումը կազդի Մոսկվայի հետ հարաբերությունների վրա։ «Ակնհայտ է, որ դրանից հետո Ռուսաստանի և Հայաստանի հարաբերությունները կվատթարանան, և Երևանն այլևս չի կարողանա հյուրընկալել նախագահ Պուտինին»,- պարզաբանել է Յարմուշը։
Նա նաև ենթադրել է, որ հենց արևմտյան երկրներից է Երևանը որոշ ակնարկներ կամ խորհուրդներ ստացել ՄՔԴ-ին միանալու վերաբերյալ: Ի պատասխան, Յարմուշի խոսքերով, Արևմուտքը կարող էր Երևանին օգնություն առաջարկել Բաքվի դեմ քրեական գործերի հաջող վարման գործում։
Նյութը հրապարակման պատրաստեց Կամո Խաչիկյանը
