Նոր հարցումներն ընդդիմությանը պարտադրում են ավելի ակտիվ լինել

Երևանի ավագանու ընտրություններում «Գելլափ Ինթերնեյշնլ Ասոցիացիան» հրապարակել է վերջին հարցման արդյունքները. համաձայն որի երևանցիների 38,3 %-ը չի կողմնորոշվել, թե ում օգտին է քվեարկելու սեպտեմբերի 17-ին կայանալիք ընտրություններում։ Հարցվածների 19,2 %-ը թեպետ կողմնորոշվել է ընտրության հարցում, սակայն հրաժարվել է բարձրաձայնել իր ընտրության մասին։ 25.9 %-ն ընդհանրապես չի մասնակցելու ընտրություններին։ Ինչպես և սպասելի էր հարցվածների ձայները շատ չեն տարբերվում։ Գործող իշխանությունները՝ «Քաղաքացիական պայմանագիր» կուսակցությունն ու Տիգրան Ավինյանը ստացել են ընտրողների ընդամենը 15,1 %-ի քվեն, 9,6 %-ն էլ նախընտրում է իր քվեն տալ «Ազգային առաջընթաց» կուսակցությանն ու Հայկ Մարությանին։ Զարմանալիորեն բավականին լուրջ առաջընթաց է գրանցել ընդդիմադիր «Մայր Հայաստան» դաշինքը ՝ 3,8 %, ևս 3 %-ն էլ պատրաստ է քվեարկել «Հանրապետություն» կուսակցության օգտին։

Այդուհանդերձ, գործող իշխանությունների 15,1%-ը վկայում է, որ նույնիսկ լավագույն քարոզարշավի դեպքում Տիգրան Ավինյանին չի հաջողվի միանձնյա վերցնել Երևանի քաղաքապետի աթոռը, իսկ ընտրություններին մասնակցող բազմաթիվ ընդդիմադիր ուժեր արդեն իսկ հայտարարել են, թե որևէ պարագայում գործարքի չեն գնալու գործող վարչախմբի հետ, սա լրջորեն թուլացնում է փաշինյանական վարչախմբի հնարավորությունները։ Ինչևէ քարոզարշավը դեռևս նոր է թափ հավաքում և հարցումները նաև լրջագույն ահազանգ են բոլոր քաղաքական ուժերի համար, որ հարկավոր է նոր կրեատիվ մեթոդներ, ավելի ակտիվ մասնակցել և սեփական ձայնը հասցնել ընտրողներին։

Առաջին և ամենագլխավոր նախապայմանը, եթե իսկապես քաղաքական ուժն ընդդիմադիր է, հարկավոր է ընտրողներին բացատրել, որ պետք է ցանկացած դեպքում մասնակցել ընտրություններին և իրենց քվեն տալ ցանկացած կուսակցության, սակայն ոչ «Քաղպայմանագրի» օգտին, միայն այդ դեպքում է հնարավոր իշխանափոխությունը Երևանում։

Սվետա Բեգլարյան