Ի՞նչ է Ֆրանսիայից եկող մարդասիրական բեռը․ Իսկանդարյանն Արցախում իրավիճակի զարգացման տարբերակներ է առաջ քաշում

Իրավիճակը կարող է տարբեր կերպ զարգանալ։ Դա կախված է նրանից, թե ինչ ճնշում եւ ինչ ձեւով է այն գործադրվելու եւ ինչի է Ադրբեջանը պատրաստ գնալ, ինչի պատրաստ չէ գնալ։ Այս մասին News.am-ի հետ զրույցում ասաց քաղաքագետ Ալեքսանդր Իսկանդարյանը։

Իրավիճակի զարգացման առաջին տարբերակն, ըստ նրա, այն է, որ Ադրբեջանը հումանիտար օգնություն թույլ չի տա ոչ այս, ոչ այն կողմից, եւ իրավիճակը կմնա մոտավորապես նույնը, ինչ հիմա։

«Անշուշտ, Հայաստանի եւ Արցախի վրա ճնշման փակ ձեւեր կան, բայց այն, ինչ այսօր տեղի է ունենում, ճնշում է Ադրբեջանի վրա։

Ի՞նչ է մարդասիրական բեռը, որը գալիս է Ֆրանսիայից: Դա պարզապես ինչ-որ հասարակական կազմակերպություն չէ, դա քաղաքական ենթատեքստ ունի։ Այս ամենի մեջ, բացի հումանիտար ասպեկտից, որն, իհարկե, կենտրոնական է, կա նաեւ քաղաքական ասպեկտ։ Մյուս կողմից՝ երեւում է, թե ինչպես է արձագանքում Ադրբեջանը։ Մարդկանց ձերբակալելն ու կանգնեցնելը նույնպես պատահական չէ»,-կարծում է Իսկանդարյանը։

Նա կասկածում է, որ Բաքուն պատրաստ է ընդունել որեւէ մեկի միջնորդությունը, քանի որ Ադրբեջանը որեւէ կոնսենսուսային լուծման մեջ մտնելու, զիջումների գնալու խնդիր չունի։

Որպես երկրորդ տարբերակ՝ փորձագետն առաջ քաշեց երկու ճանապարհների (Լաչինի միջանցք եւ Աղդամ-Ստեփանակերտ ճանապարհ – խմբ.) բացման վարկածը։

«Դժվար է պատկերացնել, որ ադրբեջանցիները հենց այնպես կսկսեն բեռները բաց թողնել Լաչինով՝ դրանք բաց չթողնելով Աղդամով։ Ինձ չի թվում, որ նրանք այդպես կանեն»,-նշեց նա։

Քաղաքագետը նկատեց, որ խնդիրը շատ ավելի լայն է, քան պարզապես բեռնատարների անցումը. Ադրբեջանը չի կատարում որեւէ պայմանավորվածության գրեթե ոչ մի կետ, ուստի երաշխիք չկա, որ հիմա այլ կերպ կլինի:

«Իրավիճակը բավականին ծանր է, եւ ինձ համար հիմա դժվար է պատկերացնել, որ ինչ-որ լուրջ քայլեր են արվում խնդիրը կարգավորելու ուղղությամբ։ Դժվար է 35-ամյա բարդ խնդրի լուծում ակնկալել ղարաբաղյան երկրորդ պատերազմից հետո հայկական կողմի համար վատթարացած պայմաններում, մեկուսացող Ռուսաստանի պայմաններում, որը չի ցանկանում կամ չի կարող (քաղաքականության մեջ դա նույնն է) նպաստել խնդրի լուծմանը»,-հավելեց Իսկանդարյանը։

«Բացի այդ, այնտեղ նախկինի պես գործում են Լեռնային Ղարաբաղի Հանրապետության կառավարող մարմինները, նախկինի պես արցախցիները չեն պատրաստվում վերցնել ադրբեջանական անձնագրերը, եւ դա ցույց է տալիս այդ մարդկանց վերաբերմունքը Աղդամի ճանապարհի բացման հեռանկարի նկատմամբ։ Իսկ դա անում է ոչ այնքան պետությունը (ԼՂՀ), դա անում են մարդիկ»,-եզրափակեց վերլուծաբանը։