Ավինյանի «հարց լուծող» կերպարը փլուզվում է
ՎԵՐԼՈՒԾՈՒԹՅՈՒՆՆԵՐ
Երևանի քաղաքապետի ընտրություններում գործող իշխանությունները փորձում են Տիգրան Ավինյանից ստանալ «հարց լուծող տղայի» կերպար։ Ամբողջ քարոզարշավը, որ սկսվել է արդեն 1 տարի առաջ, իրականացվել է մեկ թեզի վրա, իբր իշխանությունների թեկնածուն կարողանում է հարցեր լուծել և հարաբերվել «զիլ» տղերքի հետ։ Ինքը՝ Ավինյանը, ողջ ընթացքում պտտվում էր, կարմիր ժապավեններ կտրում, ինչ–որ բաներ քանդել տալիս, կոշտ հայտարարություններ անում։ Ըստ էության, «Ասե՛ք, կանե՛նք» փիլիսոփայությունը դրված էր ի սկզբանե։
Իշխանություններն ամիսներ շարունակ նրանից կառուցում էին հարց լուծողի կերպար։ Այս փիլիսոփայությունը դրվել է նաև նախընտրական քարոզարշավի ընթացքում ՔՊ քարոզչական պաստառների և ցուցանակների վրա։ Փորձել են տպավորություն ստեղծել, թե իբր Ավինյանն ինքնավստահ տղա է։ Նման պաստառներն, ի դեպ, սովորական փիառի դեպքում հակացուցված են, քանի որ Ավինյանը կանգնած է ձեռքերը ծալած, ինչը փակ մարդու ժեստ է և կարող է վանել ընտրողներին։ Նույնիսկ այդ նկարներում Տիգրան Ավինյանը վերևից է նայում սեփական կուսակիցների վրա։ Բնույթով ցինիկ և սնոբ, նա անգամ այս պատկերներում է փորձել իրեն վեհ պահել սեփական թիմակիցներից։ Ի դեպ, հենց դա էլ Ավինյանի և «Քաղպայմանագրի» մյուս անդամների միջև հակամարտության և ակնհայտ դժգոհության պատճառն է։ «Քաղպայմանագրում» համարում են, որ Ավինյանն իրեն հեռու է պահում կուսակիցներից և ընդհանրապես զզվում բոլորից, այդ թվում նույնիսկ Նիկոլ Փաշինյանից։
Ըստ մասնագետների՝ քաղաքական փիառի տեսակետից, Ավինյանի համար ստեղծվող այս կերպարը չափազանց ռիսկային է, հատկապես, որ նա վերջին շրջանում փորձում է ժարգոնով սուտ գողականի կերպարով ու բառամթերքով հարաբերվել ոչ միայն քաղաքացիների, այլ նաև նույնիսկ քրեականների հետ, իսկ այդ կերպարը երբեք էլ բնութագրական չի եղել Փաշինյանի այս թիմակցի համար։ Մարդ, ով տարիներ շարունակ խեղճ ու կրակ ինտելիգետի տեսքով է հանդես եկել, հիմա փորձում է «զիլ» տղայի կերպարանք ստանալ, ինչը բնականաբար նրան չի սազում և ժպիտ է առաջացնում բոլորի մոտ, ծաղրում են անգամ օլիգարխները, որոնց հետ Ավինյանը համագործակցում է։ Բնավ պատահական չէ, որ նույնիսկ փողոցային հանդիպումները ցույց են տալիս, որ եթե արանքից հանում ես պարտադրանքով բերված բերվածներին, հերթապահ պաչիկ անող տատիկներին, ապա Ավինյանի կերպարից ոչինչ չի մնում և քարոզարշավի ընթացքում էլ նրա նյարդային դրսևորումները փաստում են այս ճշմարտությունը։
Աննա Անանյան
