Ավելի քան 1 տարի է՝ ոչ մի կուսակցության չեմ սատարում. Ես իմ տեսակետը չեմ փոխել, բայց համայնքը չպիտի տուժի. Ա. Առուշանյան
ՔԱՂԱՔԱԿԱՆՈՒԹՅՈՒՆ
Ավելի քան մեկ տարի է ես ոչ մի կուսակցության չեմ սատարում և չեմ կարծում, որ մարդկանց անցած ուղին մեկ վայրկյանում պետք է դնել, քննադատել։ Այս մասին այսօր՝ օգոստոսի 29-ին, Գորիսում լրագրողների հետ զրույցում ասաց Գորիսի քաղաքապետ Առուշ Առուշանյանը՝ անդրադառնալով վերջին շրջանում իր անձի շուրջ քննարկումներին և «Վերածնվող Հայաստան» կուսակցության նախագահ Վահե Հակոբյանի կողմից իրեն ուղղված քննադատություններին։
«Իմ հայացքներում ոչինչ չի փոխվել, ես Հայաստանի Հանրապետության համար պատրաստակամ մարդ եմ ու իմ պետության կողքին կանգնած եմ։ Ինչ վերաբերվում է իշխանությունների հետ համագործակցությանը, նույնիսկ, երբ ես եղել եմ կալանավայրում, համայնքապետարանը համագործակցություն է ունեցել իշխանությունների հետ Դա ոչ մի կապ չունի նրա հետ, ինչի համար ինձ քննադատում են։ Այդ խոսակցությունները ոչ տեղին են։
Խնձորեսկի օրինակով ասեմ, այդ նույն ժամանակ ես վարչապետին էլ, ՏԿԵ նախարարին էլ ներկայացրել եմ, որ Խնձորեսկը սահմանամերձ է և ունի ճանապարհի խնդիր։ Գործընթացները մի փոքր դանդաղ էին, իրենք զանգահարել են ու մոտ օրերս նախագիծը կդրվի տենդերի։ Այս դեպքում ես չէի կարող իմ անձնական շահով կամ տեսակետով առաջնորդվել, ես պատասխանատվություն եմ կրում 30․000 բնակչի համար, հետևաբար հարաբերությունները չեն կարող լինել սուբյեկտիվ, անձնական դաշտում»,- ասաց Գորիսի քաղաքապետը։
Նա նշեց, որ իշխանությունների կողմից ևս որևէ սուբյեկտիվ վերաբերմունք չի նկատել Գորիս համայքում իրականացվող ծրագրերի հարցում։
«Մի դրվագ կամ փաստ չկա, որ կառավարությունը ունեցել է սուբյեկտիվ վերաբերմունք ռոտացիան տալու կամ սուբվենցիոն ծրագրերը հաստատելու մասով։ Եթե որևէ հարց անձնավորված չի եղել, հետևաբար իմ կողմից ևս չպետք է լինի որևէ անձնավորված գործողություն»,- ասաց Գորիսի քաղաքապետ Առուշ Առուշանյանը։
