Արցախում հումանիտար իրավիճակը խորանում է, իսկ ՀՀ իշխանությունը հակառակն է անում

 Արցախում իարվիճակը գնալով վատթարանում է, իսկ Հայաստանի գործող վարչախումբը՝ Նիկոլ Փաշինյանի գլխավորությամբ, միայն նպաստում է, որ Արցախը հայաթափվի։ Պաշտոնական Ստեփանակերտը դիմում է ռուսական կողմին Բաքվի հետ չեզոք, անվտանգ վայրում հանդիպում կազմակերպելու առաջարկով։ «Կարծում եմ, որ պետք է դիմել Ռուսաստանի Դաշնությանը, իրավիճակով հետաքրքրվող բոլոր դերակատարներին ստեղծված իրավիճակի, անվտանգային խնդիրների, Արցախում ստեղծված հումանիտար աղետալի վիճակի շուրջ Ադրբեջանի հետ հանդիպում կազմակերպելու առաջարկ պահանջով», - ֆեյսբուքյան ուղիղ եթերում հայտարարել է պետնախարար Գուրգեն Ներսիսյանը։

Արցախը տևական ժամանակ դիմադրում էր Բաքվի հետ ուղիղ բանակցելու պարտադրանքին, սակայն իրենք էլ գիտակցում են, որ առաջիկայում, պայմանավորված եղանակի վատթարացմամբ, ստիպված են լինելու նորանոր խնդիրների բախվել, և դիմել են ռուսական կողմին՝ հանդիպում կազմակերպելու, արցախցիների տառապանքները թեթևացնելու համար։ Հատկապես, որ փաշինյանական վարչախումբն ամենևին շահագրգռված չէ ռուսական կողմի ակտիվացմամբ, ընդհակառակը, հետևողականորեն առաջ են մղում արևմտյան օրակարգերը, որոնց դեպքում արցախցիների տարհանումն անխուսափելի է դառնալու։

Արցախի պետնախարարն ընդգծել է, որ Արցախի համար խնդիրներն էլ ավելի են բարդանալու, մարտահրավերները կարող են դառնալ նույնիսկ անհաղթահարելի կամ դժվար հաղթահարելի, եթե ՀՀ-ն չցուցաբերի անհրաժեշտ քաղաքական, ռազմաքաղաքական, իրավական, տնտեսական, սոցիալական, անգամ հոգեբանական աջակցություն:

Ազգային ժողովի պատգամավոր Տիգրան Աբրահամյանի գնահատմամբ, առաջին հայացքից ակնհայտ ճշմարտություն է ասվում, որի մասին շատերն են խոսում, սակայն կարևոր է, որ սա հնչում է Արցախից ու հիմնական պատասխանատուներից մեկի կողմից: «Հայաստանի իշխանությունն Արցախի հարցում ստեղծված աղետալի վիճակի համար մեղավոր է ոչ միայն նրա համար, որ իր քաղաքական կուրսն է բերել և նման ծանր հանգրվանի հասցրել, այլ նրա, որ այդքանից հետո շարունակում է պնդել իր կործանարար դիրքորոշումը: Արցախի ներքին ռեսուրսներն անսպառ չեն և եթե ՀՀ իշխանությունը սոցիալական բնույթի սահմանափակ օժանդակությունից բացի քաղաքական, անվտանգային հարցերում ներգրավածություն չապահովի, ապա իրադրությունը շատ արագ քաոսի կվերածվի»,- նշել է պատգամավորը՝ հավելելով, որ ՀՀ իշխանությունը սա լավ հասկանում է, բայց անում է ճիշտ հակառակը:

Աննա Աղաբաբյան