Նիկոլ Փաշինյանի էժանագին սադրանքը. ինչպե՞ս են հայաթափում Արցախը

Հայաստանի վարչապետի պաշտոնը զբաղեցնող Նիկոլ Փաշինյանը երեկ հերթական հայտարարություններն է արել՝ ադրբեջանական կեղտոտ նարատիվներն առաջ տանելով։ Ըստ Փաշինյանի՝ Երևանը Բաքվին է փոխանցել Հայաստանի և Ադրբեջանի միջև խաղաղության պայմանագրի հայկական նոր առաջարկները։ Կառավարության նիստում Փաշինյանը նշել է, թե սա երկու երկրների ԱԳՆ-ների միջև փոխանակվող հնարավոր պայմանագրի խմբագրումների արդեն 5-րդ տարբերակն է։

Մինչ Փաշինյանը խոսում է խաղաղության այս պայմանագրի մասին, շարունակվում է փակ մնալ Լաչինի միջանցքը, միայն առողջական խնդիրներով հատուկենտ մարդկանց են թույլատրել, իսկ վերջին օրերին նաև 100-ից ավելի մարդկանց, որոնք կամ ուսանողներ են, կամ էլ Ռուսաստանի դաշնության անձնագիր ունեն։ Հանկարծակի կերպով տասնյակներով Արցախում Ռուսաստանի քաղաքացիություն ունեցող անձանց հայտնվելը վկայում է, որ ըստ ամենայնի ռուսական կողմը ևս շահագրգռված է Արցախի հայաթափմամբ և անձնագրեր է բաժանում, սակայն ամենավտանգավոր հայտարարությունը, որ արել է Նիկոլ Փաշինյանն այն է, թե հավաստի տեղեկություններ ունեն, որ Բաքուն պլանավորում է Լաչինի միջանցքը միակողմանի բացել՝ թույլ տալով ելք, բայց ոչ մուտք դեպի Լեռնային Ղարաբաղ։

Նիկոլ Փաշինյանի այս հայտարարությունը ոչ այլ ինչ է, քան էժան սադրանք։ Ըստ էության, ժամանակին սադրանքի մեջ գցելով Աղդամի թեման, Արայիկ Հարությունյանը և նրա սպասարկուների միջոցով արտահոսք տալով, որ Աղդամի ճանապարհը պետք է բացվի, միաժամանակ Նիկոլ Փաշինյանն իր այս հայտարարությամբ հայ հանրությանը հասկացնում է, որ հարցը լուծված է, Արցախն ինտեգրելու են Ադրբեջանին, նաև ուղերձ է հղում հիասթափված արցախցիներին, որ ժամ առաջ պետք է լքել Արցախը, հենց պարզվի, որ Լաչինի միջանցքը միակողմանի բացվել է։

Բնականաբար Արցախի բնակչության մեծամասնությունը մտադիր չէ լքել իր բնօրրանը, սակայն կլինեն շատերն, ովքեր զզված շրջափակման գրեթե իննամսյա դժվարություններից ցանկություն կունենան հեռանալ, այդ կերպ Փաշինյանը կարող է չքմեղանալ, թե ինքն ամեն ինչ արել է արցախցիների տարհանումն ապահովելու համար։ Իբր միամիտ ժուռնալիստական ոճով Նիկոլ Փաշինյանը սադրում է, որ Արցախը հայաթափվի։ Փաստացի սա հերթական սինխրոն գործողություն է Իլհամ Ալիևի և Նիկոլ Փաշինյանի կատարմամբ, որը միտված է հենց Արցախի հայաթափմանը։

Արեն Ալավերդյան