Ավագանու ընտրություններում ՔՊ-ի հույսը կրիմինալն է

Երևանի ավագանու քարոզարշավը նոր է սկսվել, սակայն «Քաղաքացիական պայմանագրում» սկսել են պարզել, որ լուրջ խնդիրներ ունեն։ Մեր տեղեկություններով՝ Տիգրան Ավինյանի կողմնակիցներն օրերս դիմել են «գողական աշխարհին», որպեսզի վերջիններս միացնեն իրենց բոլոր ռեսուրսները և կարողանան ազդեցություն ունենալ ընտրական գործընթացների վրա՝ հօգուտ «Քաղպայմանագրի»։ Ընդ որում, սկզբից փորձել են նախ ոստիկանների միջոցով ազդել թաղային հեղինակությունների վրա, սակայն վերջիններս ցրել են, հրաժարվել համագործակցել իշխանությունների հետ, ընդ որում շատ դեպքերում ոչ թե ուղիղ և բաց տեքստով են հայտնել իրենց մերժումը, քանի որ այդ դեպքում կարող էին խնդիրներ ունենալ օրենքի հետ, այլ պարզապես ակնարկել են, որ հակված չեն աջակցելու գործող իշխանություններին։

Ոստիկանների միջամտության ձախողումից հետո, ՔՊ-ից դիմել են քրեական տարրերին, որ հենց քրեակատարողական հիմնարկներից ազդեն քրեական պրոցեսի վրա, նաև պարտադրեն թաղային հեղինակություններին աշխատել իշխանության համար։ Այս դեպքում էլ իրավիճակն առանձնապես «Քաղպայմանագրի» օգտին չէ։ Նախ կրիմինալը չի ցանկանում գլուխ դնել գործող իշխանությունների հետ, իրենց տերմինով ասած «զապադլո» են համարում աշխատել փաշինյանական վարչախմբի համար, և էական մեկ այլ հանգամանք՝ հայաստանյան քրեական շրջանակները համակարգում են Ռուսաստանից, ծագումով հայ, օրենքով գողերի կողմից, և հայտարարել են, թե կաշխատեն «Քաղպայմանագրի» համար, եթե ունենան ռուսաստանյան կրիմինալ շրջանակների հրահանգը։

Վերջիններիս վրա ազդելու համար հարկավոր է ռուսաստանյան իրավապահների և ուժային կառույցների միջամտությունը, իսկ Ռուսաստանը բացարձակապես շահագրգռված չէ աջակցել գործող իշխանութուններին։ Թեպետ փաշինյանական վարչախումբն այս շրջանում համագործակցում է նախկիններից մնացած քրեական տարրերի, պատգամավորների, մասնավորապես՝ Մհեր Սեդրակյանի, Գագիկ Բեգլարյանի հետ, որոնք խոստացել են աջակցել, սակայն Քաղպայմանագրում հասկանում են, որ ոչ մի ռեալ հույս չկա նրանց աջակցությունից և ընդամենը բավարարվելու են կեղծ խոստումներ տալով։ Ուստի և այժմ, «Քաղպայմանագրում» մնացել է օգտագործել այլ, ավելի նվազ ազդեցիկ ռեսուրսները։

Ի դեպ, մեր աղբյուրի փոխանցմամբ, օրերս խորհրդաակցություն է եղել, որի ընթացքում արձանագրել են, թե Տիգրան Ավինյանի ռեյտինգը չափազանց ցածր է՝ 10 %-ից ավել չի ձգում և վարչական ռեսուրսով էլ հնարավոր չի լինելու հավաքել անհրաժեշտ ձայները, իսկ ընտրություններին մասնակցող իշխանության արբանյակներն ընդհանրապես անցողիկ չեն, իրենց իսկ հարցումների արդյունքներով, նույնիսկ 1 % չեն ձգում։ Հարց է բարձրացվել գումար բաժանելու մասին, գոնե ամենավստահելի ընտրողներին և ի պատասխան նշել են, թե Նիկոլ Փաշինյանն առայժմ դեմ է, դրա մասին խոսք լինել չի կարող։ Ընդսմին, ակնարկել են, որ չի բացառվում ընտրակաշառքի բաժանումը, եթե տեսնեն, թե իրավիճակը դուրս է գալիս վերահսկողությունից և ծայրահեղ ծանր է։

Անդրանիկ Խաչատրյան