Ո՞վ է խափանում ՄԱԿ ԱԽ բանաձևի ընդունմանը

Հայաստանի իշխանությունները ոչ հերքում, ոչ հաստատում են մամուլում տարածված տեղեկությունները, թե ՄԱԿ անվտանգության խորհրդի քննարկումներից հետո ամերիկյան կողմը խորհրդի անդամ երկրներին հորդորել է ձեռնպահ մնալ որևէ բանաձևի նախագիծ ներկայացնելու քայլերից։

Մամուլում երեկ այսպիսի տեղեկություն էր տարածվել և Հայաստանի և Բելգիայի արտգործնախարարների հանդիպումից հետո կայացած ասուլիսում Արարատ Միրզոյանը լրագրողի հարցին ի պատասխան ընդամենն ասել է, թե չի կարծում, թե ամերիկյան կողմը որևէ կերպ պատրաստվում է կամ կցանկանա մաս կազմել կամ նպաստել էթնիկ զտումների Ադրբեջանի քաղաքականությանը։ -Մի քիչ դժվար պատկերացնելի կլինի ինձ համար, ես կարծում եմ և հուսով եմ՝ Միացյալ Նահանգներում շատ լավ հասկանում են հումանիտար ճգնաժամի չափերը և ահագնացող տեմպերը Լեռնային Ղարաբաղում։ Նաև գիտակցում եմ, որ ՄԱԿ ԱԽ հնարավոր բանաձևը կգար օգնելու հանգուցալուծել այս իրավիճակը,- ընդամենն ասել է Արարատ Միրզոյանը՝ դիվանագիտորեն խուսանավելով և որևէ հստակ բան չասելով այս կապակցությամբ։

Սեպտեմբերին և դեկտեմբերին ՄԱԿ անվտանգության խորհրդի քննարկումներից հետո հենց հայաստանյան իշխանությունների հետ սերտ առնչություններ ունեցող լրատվամիջոցներն ու քաղաքագետները տեղեկություններ են տարածում, թե ՄԱԿ անվտանգության խորհրդի բանաձևերն արգելափակում է Ռուսաստանը, այսօր արդեն գրեթե հաստատում են այդ տեղեկությունները, որ առնվազն այս դեպքում բանաձևի կամ հայտարարության ընդունումն արգելափակում է պաշտոնական Վաշինգտոնը և բնավ էլ զարմանալի չի լինի, որ նախորդ դեպքերում ևս բանաձևի արգելափակումը եկած լինի Արևմուտքի կողմից, փոխարենը փորձեն Ռուսաստանի ուղղությամբ քարեր նետել։

Հերթական անգամ ապացուցվում է, որ Հայաստանի արտաքին քաղաքական վեկտորի փոփոխությունը, ինչպես նաև Փաշինյանի գործադրած ջանքերն այդ՝ Ռուսաստանից կտրվելու որևէ կերպ, որևէ օգուտ չեն կարող տալ Հայաստանին, այլ ընդհակառակը, սրում են իրավիճակը, իսկ Փաշինյանի նշանակած արտգործնախարարն էլ չի կարողանում հոդաբաշխ բացատրություններ տալ կատարված իրողություններին։

Արամ Բեգլարյան