ԱՄՆ-ին Վայոց ձորում միայն Ամուլսարն է հետաքրքրում

Հայաստանում ԱՄՆ դեսպան Քրիստինա Քվինը երեկ Վայոց ձոր է այցելել, մի քանի հանդիպումներ ունեցել։ Դեսպանն ԱՄՆ-ում Հայաստանի դեսպան Լիլիթ Մակունցի ուղեկցությամբ եղել է Ջերմուկում, դիտարկել սահմանային իրավիճակը, մարզպետարանում հանդիպման ժամանակ էլ հայտարարել, թե Միացյալ Նահանգներն աջակցում է Հայաստանի անկախությանն ու ինքնիշխանությանը։ Իրականում, սակայն, այցը ոչ այնքան սահմանը դիտարկելու, Ջերմուկի իրավիճակը հասկանալու, որքան Ամուլսարի համար էր։

Դեսպանը երեկ Ջերմուկ համայնքի ղեկավարի հետ այցելել է Ամուլսար՝ ծանոթանալու «Լիդիան» ընկերության կողմից իրականացվող աշխատանքներին, հայտարարել, թե Ամուլսարի ծրագիրն ԱՄՆ խոշորագույն ներդրումներից է Հայաստանում և իրենք հպարտ են, որ դրանով այստեղ ներդրվում են հանքարդյունաբերության արևմտյան ստանդարտները։ «ԱՄՆ-ն աջակցում է Հայաստանի տնտեսական զարգացմանը, ինչպես նաև ամերիկյան ընկերությունների և ներդրողների կողմից հայաստանյան տնտեսության տարբեր ոլորտներում ներգրավելու հնարավորություններին»,- ասված է դեսպանատան հայտարարության մեջ։

Տարիներ շարունակ հայ հասարակության մի ահռելի զանգված պայքարում է Ամուլսարի բացման դեմ, նշում, որ դրանով ահռելի վնաս է հասցվելու Ջերմուկին և զբոսաշրջային քաղաքը վերածվելու է ուրվական քաղաքի։ Նախորդ իշխանութունները չհանդգնեցին դեմ գնալու հասարկության կամքին և բացելու Ամուլսարը, փորձեցին հնարավորինս ձգել։ Փաշինյանական վարչախումբն իշխանության եկավ հենց մեծ հաշվով չարաշահելով նաև Ամուլսարի խնդիրը, իսկ կարճ ժամանակ անց արդեն Փաշինյանն ու նրա կողմնակիցներն Ամուլսարի բացման համոզված կողմնակից դարձան։ Եվ այսօր ամեն ինչ փորձում են անել հանքը շահագործելու համար, իսկ Արևմուտքը վաղուց արդեն իսկ ապացուցել է, որ իր համար ամենևին էլ խնդիրը Հայաստանի ինքնիշխանությունը, կամ էլ ժողովրդավարությունը չէ։ Նրանք ցանկանում են հարստահարել և շահագործել մեր պետության ընդերքը, տանել Հայաստանի բարիքները, փոխարենը երրորդ երկրի վերածված Հայաստանին կրճոններ են մնալու։

Աիդա Սանասարյան