Ո՛չ հեռախոսազանգ, ո՛չ տեսակապ, հայրիկից նորություն ստանում ենք միայն ԿԽՄԿ միջոցով. Խաչատրյանի դուստր

ՀՀ ՄԻՊ-ն այսօր հայտարարեց, որ Ադրբեջանի Գլխավոր դատախազության հայտարարությունն առ այն, որ Վագիֆ Խաչատրյանը 1991 թվականի դեկտեմբերի 22-ին «հայկական զինված կազմավորումների խմբի կազմում Մեշալի գյուղում իրականացրել է հանցագործություն», չի համապատասխանում իրականությանը:

MediaHub-ի հետ զրույցում Վագիֆ Խաչատրյանի դուստր Վերան նշեց, որ ծանոթ է այդ հայտարարությանը: Իր կողմից էլ շեշտեց՝ Բաքվի կողմից նշված բոլոր հանցագործությունները չեն համապատասխանում իրականությանը, իսկ իր հոր նկատմամբ միջազգային բազմաթիվ նորմեր են խախտվել:

Նա ասաց, որ Վագիֆ Խաչատրյանի մասին նորություն ստանում են միայն Կարմիր Խաչի միջոցով: 

«Նա հիմա գտնվում է Բաքվի մեկուսարանի բուժական բաժանմունքում, վիճակը բավարար է, դեղեր է ընդունում, սակայն մենք գիտենք և նաև բժիշկն է հաստատել, որ նման հիվանդության ժամանակ գոյություն չունի դեղ, որը կառող է օգնել»,- պատմեց Վերան:

Հիշեցնենք, որ Վագիֆ Խաչատրյանը Կարմիր Խաչի միջնորդությամբ տեղափոխվում էր Հայաստան, որտեղ պետք է անհապաղ սրտի վիրահատության ենթարկվեր, երբ նրան առևանգեցին: Եվ հիմա  Բաքվում, փաստացի, ասում են, որ դրա կարիքը չկա: 

«Հայրիկիս հետ խոսում ենք նամակագրոիթյան միջոցով՝ Կարմիր Խաչի միջնորդությամբ և իրենց տված տեղեկություններով գիտենք իր վիճակի մասին: Հեռախոսազանգ կամ տեսակապ դեռևս չի եղել: Անհամբեր սպասում ենք»,- հավելեց Վերան:

Գեղեցիկ Մանուկյան