Ի՞նչ է կատարվում հայկական բանակում

 Վերջին 15 օրվա ընթացքում Հայաստանի զինված ուժերում երեք մահ է եղել, երեքն էլ խաղաղ պայմաններում։ Վերջին դեպքը 5 օր առաջ էր, երբ Պաշտպանության նախարարությունը գուժեց, որ դեռ չպարզված հանգամանքներում հրազենային վիրավորում է ստացել Շիրակի մարզի Բենյամին գյուղից Գրանիկ Խնկոյանը, որն այս տարվա հունվարին էր զորակոչվել։

Դրանից մեկ օր առաջ նույն զորամասում էլ, ըստ քննչական կոմիտեի, ինքնասպան էր եղել մեկ այլ զինծառայող՝ Ժորա Կարապետյանը։ Եվս մոտ երկու շաբաթ առաջ էլ սպանվել էր զինծառայող Մուրադ Գրիգորյանը։ Պաշտպանության նախարարությունից նախ հայտարարեցին, թե զինվորին ինքնասպանության են հասցրել, իսկ մի քանի օր անց, տեղեկությունը խմբագրեցին, թե Մուրադին սպանել է ծառայակիցը՝ վիրավորանքի պատճառով։

Իսկ երեկ ադրբեջանցի զինծառայողները հայ պահեստազորային են ձերբակալել. Գագիկ Աշոտի Ոսկանյանին։ Ըստ պաշտոնական տեղեկությունների մոլորվել և հայտնվել է ադրբեջանական տարածքում, որտեղ էլ նրան վիրավորել, ձերբակալել և տարել են անհայտ ուղղությամբ, ընդ որում այս տեղեկությունը Բաքուն օգտագործել էր Հայաստանի դեմ հերթական մեղադրանքներ տեղալու, Հայաստանի զինված ուժերին դիվերսիոն ներթափանցման փորձի մեջ մեղադրելու համար։

Նախկին փոխվարչապետ Սուրեն Պապիկյանին պաշտպանության նախարարություն տեղափոխելով՝ Նիկոլ Փաշինյանը խոստանում էր, թե բանակում լուրջ բարեփոխումներ են իրականացվելու։ Որևէ բարեփոխման, առնվազն 44-օրյա պատերազմից հետո, հայկական բանակն այդպես էլ չի տեսել, փոխարենը տեսել է ստեղծված արատավոր բարքերի առավել խորացում, հովանավորչություն, մահերը կոծկելու փորձեր և տեղեկությունները հանրությունից թաքցնելու դեպքեր, ինչը վկայում է, որ Հայաստանի գործող իշխանությունները պարզապես պատերազմ են հայտարարել բանակին, թքած ունեն ամեն ինչի և առաջին հերթին երկրի պաշտպանունակության վրա և փորձում են ոչ միայն բանակն, այլ նաև պետական այլ ինստիտուտներն օգտագործել բացառապես մեկ նպատակով՝ սեփական իշխանությունն ամեն գնով երկարաձգելու, իսկ Հայաստանի Հանրապետությունն օրեցօր ավելի է գլորվում անդունդը՝ դրանից բխող ամենածանր հետևանքներով։

Նարե Մուրադյան