Խաղարկում են 2021-ի ընտրությունների սցենարը

Չնայած երկրում ստեղծված գերծանր իրավիճակին, Արցախյան 8-ամսյա բլոկադային, իշխանություններն ինքնամոռաց վակխանալիայի մեջ են և գլխապատառ նախապատրաստվում են Երևանի ավագանու ընտրություններին։ Ավելին, արդեն պարզ է, որ իշխանությունը, ավելի կոնկրետ Նիկոլ Փաշինյանն ամեն ինչ անելու է՝ ընտրություններին հաղթանակ տանելու նպատակով։  

Եթե հարցը դիտարկենք գլոբալ տեսակետից, ապա միանշանակ է, որ ընտրական գործընթացի ընդհանուր տրամադրությունն այն է, որ երկրում ստեղծված գոյաբանական սպառնալիքների պայմաններում Երևանի ավագանու ընտրություններին մասնակցությունն անիմաստ է, որ իշխանությունը, միևնույն է, վարչական ռեսուրսներով հաղթելու է դրանցում և, որ պետք է կենտրոնանալ ավելի կարևոր, առաջին հերթին՝ Արցախի խնդրի վրա։

Ըստ էության՝ նշված փաստարկները հիմնազուրկ չեն, քննարկելի են, մյուս կողմից, սակայն, հիմնավոր է նաև այն թեզը, որ ընտրություններում Տիգրան Ավինյանի հաղթանակը, առաջին հայացքից՝ կապ չունենալով Արցախի հետ, իրականում ուղղակիորեն ազդելու է առաջին հերթին՝ Արցախի հարցի վրա՝ դրա ոչ հայանպաստ լուծման երաշխավորված հեռանկարով։ Շատ կարևոր է ընդգծել, որ այստեղ խնդիրն այն է, որ անկախ նրանից, թե ինչպես են մատուցվում ընտրությունները (հիմնականում իշխանական քարոզչականները շեշտում են, որ այն զուտ կառավարչական-վարչարարական պաշտոնյայի ընտրություններ են), սակայն դրանց համատեքստը միանշանակ քաղաքական է՝ նույնքան քաղաքական հետևանքներով։

Ինչպես հայտնի է՝ ցանկացած ընտրություն իշխանության համար վստահության հանրաքվեի նշանակություն ունեն, մի յուրահատուկ տեքստ է։ Բնականաբար պարզ է, որ Երևանում, որտեղ կենտրոնացած է ՀՀ բնակչության շուրջ կեսը և ակտիվ հանրային կյանքի գերակշիռ մասը, սեպտեմբերի 17-ին նախատեսվող ընտրություններն առաջին հերթին Փաշինյանի վստահության մասին են։ Դա է պատճառը, որ անգամ ներքին հակասությունների պարագայում, անձնական խնդիրներ ունենալով Ավինյանի հետ՝ Փաշինյանն արդեն իսկ անում է և անելու է առավելագույնը՝ ընտրություններում հաղթելու համար:

Հենց դրանով է պայմանավորված, որ ողջ վարչական համակարգը գործի է դրված և մարզերում երևանաբնակների ցուցակներ են մշակվում, ավելի կոնկրետ հստակ գրաֆիկ են կազմել, թե ով որտեղից ինչ որակի ձայներ պետք է ապահովի։ Ավելին, այս օրերին մարզային պատգամավորներին խստիվ հանձնարարված է գտնվել տեղում ու ապահովել տեղի ունեցող գործընթացի նորմալ ու կանոնակարգված աշխատանքը։

Ասվածն ամփոփելով, նշենք մի կարևոր բաղադրիչ․ քննարկման ենթակա չէ այն դրույթը, որ Նիկոլն ամենալկտի կերպով խաբել է հասարակությանը՝ մոլորեցնելով՝ խլել է նրանից իշխանությունը, և այդ իշխանությունն օգտագործելով՝ այսօր անում է այն ամենի հակառակը, ինչի համար 2021-ի ընտրություններում վստահության քվե է ստացել ու ցինիկաբար թռել «բազարից», հիմա փորձում է նման մի սցենար խաղարկել Երևանի պարագայում։ Այլ կերպ ասած՝ Նիկոլի այսօրվա էլեկտորալ մանդատը, որով նա արդարացնում է իր՝ իշխանությունը պահպանելը, միանգամայն բովանդակազուրկ է և կեղծ: Իրականում նա ոչ թե ժողովրդի իշխանության կրողն է, ինչպես ներկայացնում է, այլ ժողովրդից իշխանություն խլողն ու պետականությունը տապալողը:

Արմեն Հովասափյան