Երևանի ավագանու ընտրությունները գնալով ավելի հետաքրքիր և թեժ են դառնում
ՎԵՐԼՈՒԾՈՒԹՅՈՒՆՆԵՐ
Երևանի ավագանու ընտրությունները գնալով ավելի հետաքրքիր և թեժ են դառնում։ Նախկին քաղաքապետ Հայկ Մարությանը, որը՝ 2021 թվականին սեփական կողմնակիցների կողմից դավաճանվել և հեռացվել էր քաղաքապետի պաշտոնից, երեկ տեսաուղերձ է հրապարակել և հայտնել, որ մասնակցելու է Երևանի ավագանու ընտրություններին, ընդ որում մասնակցության համար Մարությանն ընտրել է ոչ թե հայտնի որևէ կուսակցություն և նրա ցուցակով մասնակցելու, այլ «Ազգային առաջընթաց» կոչվող կուսակցությունը, որն ընդամենը հասցրել էր մասնակցել 2021 թվականի ընտրություններին՝ չափազանց ցածր տոկոսներ հավաքելով։
Ըստ էության, այս անգամ այս կուսակցությունը ռեալ շանսեր ունի լուրջ արդյունք ցուցաբերելու, և խնդիրը, ոչ թե ամենևին էլ կուսակցությունն է, կամ նրա գաղափարախոսությունը, այլ որ ցուցակն առաջնորդելու է հենց՝ Հայկ Մարությանը։ Իր պաշտոնավարման ընթացքում՝ թերություններին զուգահեռ, Մարությանը բավականին պարկեշտ քաղաքական գործիչ է համարվում և իսկապես կարող է լուրջ մարտահրավեր նետել գործող իշխանություններին։
Երեկ հայտնի է դարձել, որ ավագանու ընտրություններին մասնակցելու է «Մայր Հայաստան» շարժումը, Ազգային ժողովի «Հայաստան» խմբակցության պատգամավոր Անդրանիկ Թևանյանի գլխավորությամբ։ Գրեթե մեկ տասնյակ կուսակցություններ արդեն իսկ հայտարարել են, որ մասնակցելու են Երևանի քաղաքապետի ընտրություններին և նրանց մի մասը, իհարկե, փաշինյանական իշխանության ներկայացուցիչներ են, կամ էլ փսևդոընդդիմադիրներ, որոնց նպատակն իրականում ձայների փոշիացումն է, սակայն թե՛ Մարությանը, թե՛, օրինակ, «Ապրելու երկիր» կուսակցությունը և այլ քաղաքական ուժեր կարող են ռեալ մրցակցություն ապահովել, իսկ վերջում արդեն իշխանափոխություն իրականացնել Երևանում, ուստի, բնավ էլ զարմանալի չէ, որ երեկ Մարությանի հայտարարությունից հետո, իշխանական քարոզիչների մի ամբողջ կոհորտա նետվեց Մարությանին սևացնելու և վարկաբեկելու գործին։
Անի Մուսաելյան
