Փաշինյանի միակ հույսը հասարակության պառակտումն է

Հայաստանի բնակչության 94,4 %-ն ընդունելի չի համարում Ադրբեջանի կազմում Արցախի բնակչության փոքրամասնության պլանավորումը։ «Գելլափ Ինթերնեյշնլ Ասոցիացիան» օրերս հրապարակել էր իր հարցման արդյունքները, որոնք չափազանց ուշագրավ են հատկապես Արցախի հարցի վերաբերյալ հանրային ընկալումներում։ Հայաստանի բնակչության ընդամենը 1,1 %-ն է նշել, որ իրենց համար միանշանակ ընդունելի է Արցախի բնակչության փոքրամասնության կարգավիճակի տրամադրումն Ադրբեջանի կազմում և 2,7 %-ը նշել է, որ ավելի շուտ ընդունելի է, 5,5 %-ը նշել է, որ ավելի շուտ ընդունելի չէ և 88,9 %-ը միանշանակ ընդունելի չի համարում, որ Արցախը լինի Ադրբեջանի կազմում։

Ի դեպ նախորդ հարցման արդյունքում, որ տեղի էր ունեցել մայիսին, այդ տարբերակը ժխտել էին հարցվածների 86 %-ը, փաստացի 8 %-ով ավելացել է Հայաստանի այն քաղաքացիների թիվը, որոնք դեմ են Արցախն Ադրբեջանի կազմում ընդգրկելուն։ Ցուցանիշի փոփոխության պատճառը, ըստ փորձագետների, Արցախում Ադրբեջանի կողմից ստեղծված հումանիտար, ծայրահեղ ծանր իրավիճակն է։ Այս հարցումը հերթական անգամ վկայում է, որ Նիկոլ Փաշինյանի հռչակած Խաղաղության դարաշրջանը վաղուց ձախողվել է։

Մինչ փաշինյանական իշխանությունն Արցախը ճանաչում է որպես Ադրբեջանի մաս և հայտարարում, թե խորհրդարանական արտահերթ ընտրություններում իրենք քվե են տվել խաղաղության դարաշրջան հաստատելու համար, Հայաստանի հանրությունը պարզապես Փաշինյանին ցույց է տալիս իր տեղը։ Իհարկե՝ օբյեկտիվորեն հարց է առաջանում, թե ինչու՞ նման պայմաններում հանրությունը դեռևս հանդուրժում է Նիկոլ Փաշինյանին և նրա թիմին իշխանության ղեկին։ Պատճառը, թերևս նաև ընդդիմության ամորֆ գործողություններն են, ոչ բավարար չափով պայքարը և նաև պայքարի իրական ուղենիշներ չներկայացնելը, այլապես հասարակությունն իսկապես կարող է կոնսոլիդացվել և միահամուռ հեռացնել դավաճան և ապիկար իշխանություններին։

Թերևս, այդ հանգամանքով է պայմանավորված, որ Նիկոլ Փաշինյանն ու իր թիմակիցներն ամեն ինչ անում են հանրային պառակտումն ավելի խորացնելու, իրենց սպասարկուների և քարոզչամիջոցների միջոցով փորձում անընդհատ տարանջատումներ մտցնել հայաստանցի և ղարաբաղցի, տարանջատումներ մտցնել Հայաստանի տարբեր բնակավայրերի բնակիչների միջև, տարանջատումներ մտցնել՝ սոցիալական, կրոնական, գենդերային հատկանիշներով։ Փաշինյանը 5 տարվա իշխանության ընթացքում ապացուցել է, որ կարող է մնալ իշխանության ղեկին՝ հասարակությանը միայն սևերի և սպիտակների բաժանելով, այլ տարբերակ իշխանությանը մնալու նա պարզապես չունի, ուստի և հենց ինքն էլ ամեն ինչ անում է այդ տարանջատումը խորացնելու համար։

Մարիա Մամյան