Գուրգեն Արսենյանի երազանքը դժվար կատարվի

Հայաստանյան մամուլում ժամանակ առ ժամանակ տեղեկություններ են շրջանառվում, թե առաջիկայում փոխելու են Ռուսաստանում Հայաստանի դեսպանին, և Վաղարշակ Հարությունյանի փոխարեն նշանակելու են Ազգային ժողովի «Քաղպայմանագիր» խմբակցության պատգամավոր Գուրգեն Արսենյանին։ Մեր տեղեկություններով՝ սա ավելի շուտ զոնդաժ է, քան իրականություն։ Արսենյանն ինքն է պարբերաբար մամուլի միջոցներով այս տեղեկությունները տարածում։ Մի կողմից նա փորձում է իր խմբակցության պարագլուխ Նիկոլ Փաշինյանին հիշեցնել, որ դեմ չէ Հայաստանից հեռանալուն, քանի որ վաճառել է Հայաստանում բոլոր բիզնեսները, իսկ ողջ գումարը ներդրել դրսում տարբեր բաժնետոմսերի մեջ։

Արսենյանը մի մարդ է, որն ավելի շատ զբաղվում է բուքմեյքերական գործունեությամբ և համապատասխանաբար գումարներն էլ ներդրել է նման ընկերություններում։ Անշահախնդիր չէ նաև Գուրգեն Արսենյանի՝ հայ-թուրքական սահմանը բացելու լոբբինգը։ Մարգարայի հատվածում Արսենյանը զգալի հողատարածքներ է գնել և այժմ սպասում է, որ հայ-թուրքական սահմանը բացվի, որպեսզի կարողանա այդ հողակտրոները վաճառել բարձր գնով և ընդհանրապես իր ունեցած բոլոր բիզնեսները հանել Հայաստանից։

Մյուս կողմից Արսենյանը նման տեղեկություններ տարածելով՝ փորձում է հասկանալ, թե ինչ ռեակցիա կլինի Ռուսաստանում։ Ժամանակին, երբ Արսենյանը Ռոբերտ Քոչարյանի տրամադրության տակ էր, համարվում էր նրա աշխատակազմի ղեկավար Արմեն Գևորգյանի հովանավորյալը, զգալի բիզնեսներ է արել, նաև որոշակի կապեր ուներ Մոսկվայում, հատկապես «լիբերալ» թևի մոտ։ Հիմա այդ թևն ընդհանրապես գոյություն չունի, որևէ դերակատարում չունի ռուսական շրջանակներում, իսկ շատերն էլ հեռացել են Ռուսաստանից։ Ինքը՝ Արսենյանը, տևական ժամանակ զբաղված էր հակառուսական նարատիվներ տարածելով, և փորձում է հասկանալ, թե ինչպես իր նշանակման հնարավորությանը կարձագանքեն ռուսական շրջանակները։ Հատկապես կարող են լուրջ խնդիրներ առաջանալ ագրեմանի հետ կապված։

Ռուսաստանում բավականին լավ են գիտակցում, թե ով է Գուրգեն Արսենյանը, ինչ սկզբունքներ ունի և ընդհանրապես ինչով է զբաղված, հատկապես հաշվի առնելով վերջին շրջանի հայտարարությունները Ռուսաստանի վերաբերյալ։ Եվ այս կապակցությամբ Արսենյանը փորձում է իր համար որոշակի ապահովագրումներ ստանալ Ռուսաստանից։ Մեր աղբյուրների փոխանցմամբ՝ նրան պարզապես հասկացրել են, որ առանձնապես իրենից ոչինչ չի ներկայացնում և ռուսական կողմը բնավ էլ շահագրգռված չէ Վաղարշակ Հարությունյանին փոխարինել Գուրգեն Արսենյանով։ Այս տեղեկությունը հաստատում է նաև ռուսական «Սպուտնիկ Արմենիա» գործակալությունը ՌԴ ԱԳՆ աղբյուրի մեկնաբանությունում. «Ռուսաստանում լիովին բավարարված են Վաղարշակ Հարությունյանի հետ փոխգործակցության մակարդակից և Արսենյանի հնարավոր նշանակումը դեսպանի պաշտոնում համարում են ոչ այլ ինչ, քան էժան խայծ։ Հավանաբար ինչ-որ մեկն ուզում է ռուս-հայկական հարաբերություններին վնաս հասցնելու հաշվին իր շահերն առաջ տանել։ Իհարկե, Ռուսաստանում Հայաստանի դեսպանի փոփոխությունը Երևանի բացառիկ իրավասությունն է, սակայն ռուսական կողմը լիովին բավարարված է Վաղարշակ Հարությունյանի հետ փոխգործակցության մակարդակից»,- ասել է աղբյուրը։

Աստղիկ Մելիքյան