Հայ-թուրքական հարաբերությունները հերթական «փորձությունն» են անցնում

Հայ-թուրքական հարաբերությունները հերթական «փորձությունն» են անցնում։ Հայկական լոբբիի ազդեցությամբ՝ «Disney» ընկերությունը որոշել է չհեռարձակել ժամանակակից Թուրքիայի հիմնադիր Աթաթուրքի մասին պատմող վավերագրական սերիալը, չնայած ավելի վաղ հաղորդվում էր, թե այն կցուցադրվի հոկտեմբերին Թուրքիայի հիմնադրման հարյուրամյակի կապակցությամբ։

Թուրքական իշխանության գրեթե բոլոր մակարդակի ներկայացուցիչները, թերևս բացի Էրդողանից, արտահայտվել են «Disney» ընկերության որոշման կապակցությամբ, նույնիսկ հայ-թուրքական հարաբերություններում բանագնաց Սերդար Քըլըչն է անդրադարձել դրան, նշել, որ Երևանում «Նեմեսիս»-ին նվիրված հուշարձանի կառուցումը և հայկական լոբբիի ջանքերով նվիրված «Աթաթուրքի» ֆիլմի չեղարկումը վտանգում է հայ-թուրքական հարաբերությունների գործընթացը և բացասաբար ազդում բանակցային գործընթացի վրա։ Իհարկե՝ Հայաստանի գործող իշխանությունները բացարձակապես որևէ կերպ կապված չեն «Disney» ընկերության որոշման հետ, ավելի շուտ սա ԱՄՆ-ում ազդեցիկ հայկական լոբբիի աշխատանքի արդյունքն է, որ հերթական անգամ ցույց են տվել Թուրքիային իր տեղը։

Իհարկե գաղտնիք չէ, որ թուրքական իշխանությունները չափազանց մտահոգված են ԱՄՆ-ում հայկական լոբբիի ազդեցությունից, իսկ քայլն ապացուցում է, որ նրանց մտահոգություններն իսկապես տեղին են։ Թուրքական իշխող կուսակցության ներկայացուցիչը՝ արտգործնախարար Հաքան Ֆիդանը, հետախուզության ղեկավար՝ Իբրահիմ Քալանը և այլոք դատապարտել են ««Disney»-ի այս քայլը, նաև կոչ արել բոյկոտել ընկերությանը Թուրքիայում։

Առաջիկայում ««Disney plus» ընկերությունը հայտարարություն է տարածելու Աթաթուրքի մասին ֆիլմի հեռարձակումը չեղարկելու կապակցությամբ։ Անկախ նրանից, թե ինչ որոշում կկայացվի, հայ–թուրքական հարաբերությունների կարգավորման գործընթացը հերթական հարվածը ստացավ, իսկ Թուրքիան էլ պարզորոշ կարող է հասկանալ, որ այդ գործընթացը բնավ էլ ամբողջությամբ իրենց ցանկությամբ չի իրականանալու։

Հայկ Անանյան