Սարսափելի կարկուտ Ալավերդիում․ մարդիկ ճանապարհ են փակում

Երեկ Լոռու մարզի Ալավերդի համայնքում և շրջակա՝ Օձուն, Աքորի, Հագվի գյուղերում տեղացած սարսափելի կարկուտի հետևանքով տեղի են ունեցել աներևակայելի չափերի հասնող ավերածություններ։ Մասնավորապես՝ մոտ 30 րոպե տեղացած գերխոշոր չափի կարկուտը վնասել է տների տանիքներն ու ապակիները, հողին հավասարեցրել արդեն հնձի ենթակա ցորենի դաշտերն ու մարդկանց այգիները։ Եթե փորձենք հավաքական գնահատական տալ, ապա բնակչության ողջ բերքը գրեթե 100 տոկոսով ոչնչացված է, այգիներում ոչ մի բանջարեղեն և միրգ գոյություն չունի։

Հավելենք նաև, որ բացի դրանից առանձնապես մեծ վնաս է հասցվել նաև շարժական փոխադրամիջոցներին, որոնք վնասվել են մոտ 50-70 տոկոսով (վնասվել է ավտոմեքենաների դիմացի և հետևի ապակիները, վնասվել ողջ մետաղական հատվածները)։ Այլ կերպ ասած մարդիկ կրել են աննկարագրելի չափերի վնասներ և առավոտվանից բավական անելանելի ու պատային իրավիճակում են։

Առավոտվանից չեն դադարում համայնքապետարան և ԱԻՆ ծառայություն ուղղված հեռախոսազանգերը, որով մարդիկ պատկան մարմիններին փորձում են ներկայացնել իրենց կրած վնասների չափերը և ծավալները, ոմանք ամբողջ արհավիրքը լուսանկարել և տեսանկարահանել են՝ տարածելով նաև սոցցանցերում։

Նշենք նաև, որ ներկայումս նախատեսվում է ստեղծել համայնքային հանձնաժողով, որը պետք է գնահատի վնասի չափերը, ոմանք արդեն գրանցվել են, սակայն, մեր տեղեկություններով, ոչ ոք հույս չունի թե ինչ-որ օգնություն կամ փոխհատուցում կլինի պետության կողմից, քանի որ մասնավոր զրույցներում մարդիկ ասում են, թե «եղունգ ունես՝ գլուխդ՝ քորի, մենք, մեր խնդիրները․ ով ա՞ մեր մատից փուշ հանել, որ հիմա հանեն»։

Ըստ էության՝ մարդիկ շվարած ու մոլորված չգիտեն՝ ինչպես կազմակերպեն ու լուծեն իրենց առաջ ծառացած այս հարցը, քանի որ խոսքը մի ահռելի ծավալի գումարի մասին է, իսկ շարքային գյուղացու համար համպատրաստից նման չափերի գումար հայթհայթելը գրեթե անհնարին է, իսկ ապառիկ կարգով թիթեղ ձեռք բերելն ունի իր բարդությունը․ մարդկանց մեծ մասը մեծ չափերի վարկերի տակ են, իսկ ոմանք ուղղակի «սև» ցուցակում են ոչ մի կոպեկ ստանալու հույս ու հնարավորություն չունեն։

Ստեղծված իրավիճակն, իրոք ողբերգական է, քանի որ տեղի ուենցած բնական աղետի հետևանքով մարդիկ ուղղակի չգիտեն ինչ անեն և ում դիմեն, քանի որ պետական պատասխանատուների կողմից ոչ մի արձագանք գոյություն չունի։ Կայքի տեղական աղբյուրը հայտնում է, որ այս պահին Ալավերդիում մարդիկ վրդովված են և պատրաստվում են ճանապարհ փակել, որպեսզի մարզպետը և կառավարության ներկայացուցիչները ներկայանան և տեղում ծանոթանան բնության պատճառած վնասների չափերին։