Ի՞նչ է սպասվում Երևանի ընտրություններում
ՎԵՐԼՈՒԾՈՒԹՅՈՒՆՆԵՐ
Այսօրվանից մեկնարկում է Երևանի ավագանու ընտրությունների առաջադրումները։ Կենտրոնական ընտրական հանձնաժողովը մի քանի օր շարունակ ստանալու է Երևանի ավագանու ընտրություններին առաջադրվող քաղաքական ուժերի ընտրական ցուցակներն ու մասնակցութան հայտերը։
ԿԸՀ-ն երեկ հյուրընկալել է Երևանի ավագանու ընտրություններով հետաքրքրված 12 կուսակցության ներկայացուցիչների, ներկայացրել, թե ինչպես են իրականացվելու ընտրությունների առաջադրումները։ Այս պահին գրեթե մեկ տասնյակ քաղաքական ուժեր են հայտարարել Երևանի ավագանու ընտրություններին մասնակցելու իրենց մտադրության մասին, սակայն ընդամենը հատուկենտ քաղաքական կուսակցություններ են հստակ հաստատել, որ մասնակցելու են Երևանի ավագանու ընտրություններին։
Այս պահի դրությամբ որևէ տեղեկություն չկա խորհրդարանական «Հայաստան» և «Պատիվ ունեմ» դաշինքների մասնակցության հնարավորության մասին։ Մամուլն էլ տեղեկություններ է տարածել, որ ընտրություններին չի մասնակցելու «Հայրենիք» կուսակցությունն՝ Արթուր Վանեցյանի գլխավորությամբ։
Մի շարք թեկնածուներ, որոնք կարող էին բավականին լուրջ մրցակցություն ապահովել գործող վարչախմբին, ամենայն հավանականությամբ չեն էլ առաջադրվի։ Արդյոք ընդդիմությունը կպաշտպանի մեկ կամ մի քանի անցողիկ թեկնածուների՝ փաշինյանական իշխանությանը պարտության մատնելու համար, դեռևս վաղ է խոսել։ Առաջադրվելու հնարավորության մասին հայտարարած ուժերի մեծ մասը կամ գործող իշխանությունների հետ սերտ կապեր ունեցող քաղաքական միավորներն են, կամ էլ այնպիսի ուժեր, որոնք պարզապես առաջադրվում են ջուր պղտորելու համար։
Ընդդիմադիր կուսակցություններից թերևս միայն «Ապրելու երկիր» կուսակցությունն է, որն իրական շանսեր ունի լուրջ մրցակցություն ապահովելու և բարդացնելու գործող իշխանությունների կյանքը։ Արդյոք ընդդիմությունը կհամաձայնվի համախմբվել «Ապրելու երկիր» կուսակցության շուրջ, դեռևս վաղ է խոսել։
Նարինե Ռամազյան
