Ադրբեջանը շարունակում է ահաբեկումները, իսկ Փաշինյանն աջակցում
ՎԵՐԼՈՒԾՈՒԹՅՈՒՆՆԵՐ
Ադրբեջանը վերջին մի քանի օրերի ընթացքում երկու արցախցիների է առևանգել և նրանց դեմ քրեական գործեր հարուցել։ Առաջին դեպքը Վագիֆ Խաչատրյանի հետ կատարվածն էր, նրան հենց «Կարմիր խաչի» մեքենայից առևանգել, տեղափոխել են Ադրբեջան և մեղադրել 1991 թվականին իբր ադրբեջանցիների դեմ ռազմական հանցագործություններ կատարելու համար։ Երկրորդն արդեն նախօրեին Ռաշիդ Բեգլարյանի առևանգումն էր ոգելից խմիչքի ազդեցության տակ գտնվող Բեգլարյանը մոլորվել և հայտնվել էր Հակարիի կամրջի մոտ, Հին շեն բնակավայրից, որտեղ նա ապրում է Շուշիից տեղահանվելուց հետո։
Ըստ Արցախի դատախազության՝ Բեգլարյանի նկատմամբ դաժան ուժ են գործադրել, ձերբակալել և այժմ էլ կրկին քրեական գործ են հարուցել։ Ադրբեջանն արցախցիներին ահաբեկելու իր շարունակական գործողությունների ընթացքում ոչ մի բանի առջև կանգ չի առնում, ավելին, ըստ տարբեր աղբյուրների՝ նա մի քանի հարյուր արցախցիների ցուցակ է կազմել, որոնց փորձում է ձերբակալել և մեղադրանքներ առաջադրել և բոլոր այդ անձինք արցախյան առաջին պատերազմին մասնակցած արցախցիներ են, որոնք պաշտպանել են իրենց տունը։
Այսպիսի մեթոդներով Աիևը փորձում է ամեն կերպ ազատվել Արցախում հայկական ներկայությունից, պարտադրել արցախցիներին լքել հայրենիքը և հեռանալ, որպեսզի այդ տարածքները մնան Ադրբեջանին։ Արցախի իշխանությունները, յոթամսյա շրջափակումից հուսահատված, այլևս բախել են բոլոր հնարավոր դռները, խնդրել օգնություն ցուցաբերել սովի ճիրաններում հայտնված արցախցիներին, իսկ այդ ընթացքում Հայաստանի իշխանությունները՝ Նիկոլ Փաշինյանի գլխավորությամբ մատը մատին չեն խփում Արցախի՝ պաշարման մեջ գտնվող բնակիչներին աջակցելու համար, ընդհակառակը փաշինյանական վարչախմբի բոլոր գործողություններն ուղղված են հայերի դեմ։ Նախօրեին էլ ևս մեկ սփյուռքահայի, երիտասարդ մի աղջկա թույլ չեն տվել Զվարթնոցից մուտք գործել Հայաստանի տարածք, խլել են անձնագիրը, հետադարձ տոմս ձևակերպելու և նրան Հայաստանից արտաքսելու համար։
Սա արդեն որերորդ դեպքն է և հիմնականում նման հետապնդումներ իրականացնում են այն անձանց նկատմամբ, ովքեր երբևիցե Սփյուռքում իրենց բողոքի ձայնն են բարձրացրել Նիկոլ Փաշինյանի դավաճանական քաղաքականության վերաբերյալ։ Ըստ էության՝ Հայաստանի դեմ այժմ պայքարում են ոչ միայն արտաքին, այլև ներքին թշնամիները։
Ալվինա Եդիգարյան
