ԱՄՆ-ն ցավալի զիջումների է մղում Հայաստանին
ՎԵՐԼՈՒԾՈՒԹՅՈՒՆՆԵՐ
ԱՄՆ-ն ցավալի զիջումների է մղում Հայաստանին։ Պետքարտուղարության պաշտոնական ներկայացուցիչ Մեթյու Միլլերը ճեպազրույցում հայտարարել է, թե՝ որպեսզի խաղաղությունը հասանելի լինի, երկու կողմերն էլ պետք է գնան բարդ փոխզիջումների։ «Այդ պատճառով պետքարտուղարը շարունակել է խոսել, ինչպես Հայաստանի, այնպես էլ Ադրբեջանի ղեկավարների հետ, խրախուսել նրանց գնալ զիջումների, որպեսզի կարողանան համաձայնության գալ»,- ասել է Միլլերը։
Թե ի՞նչ բարդ զիջումների մասին է խոսում Միլլերը, որևէ կերպ չի բարձրաձայնվում։ Հաջորդ շաբաթ տարածաշրջան է այցելելու ԱՄՆ պետդեպի Կովկասի հարցերով բանակցող ԵԱՀԿ Մինսկի համանախագահ Լուիս Բոնոն, որն էլ բանակցություններ է վարելու Հայաստանի և Ադրբեջանի իշխանությունների հետ։ Ամերիկյան կողմի վերջին օրերի ակտիվությունը վկայում է, որ նրանք փորձում են Հայաստանին պարտադրել զիջումներ։
Ըստ էության 44-օրյա պատերազմից հետո Ադրբեջանը ոչ միայն որևէ զիջման, կամ փոխզիջման մասին չի խոսել, այլև շարունակում է օկուպացված պահել Հայաստանի ինքնիշխան տարածքի մի մասը, արդեն 7 ամսից ավելի անտանելի իրավիճակ է ստեղծել Արցախում, տոտալ շրջափակման ենթարկելով, վերջին օրերին էլ սկսել է առևանգել Արցախի բնակիչներին։
Օրեր առաջ առևանգել էին Վագիֆ Խաչատրյանին, իսկ երեկ էլ մոլորված Ռաշիդ Բեգլարյանին։ Ուստի և ամերիկյան կողմի այս ակնարկը վկայում է, որ նրանք զիջումներ ակնկալում են Հայաստանից, առանց այն էլ մեր երկիրը հնարավոր ամեն ինչ զիջել է, մնացել է միայն թերևս Նիկոլ Փաշինյանին զիջել։ Դեմ չենք, եթե միայն դա զիջելով հնարավոր լինի կարգավորել, սակայն, ըստ էության Ադրբեջանն այլ բան է ցանկանում, իսկ Փաշինյանի արևմտյան տերերը նրան պարտադրում են նոր զիջումներ անել Հայաստանի և Արցախի հաշվին։ Ի վերջո ցանկացած նման ցավոտ զիջում վերջնարդյունքում լրջագույն խնդիրներ է հարուցելու հենց Հայստանի և Արցախի համար։
Աղավնի Բաղդասարյան
