Լրատվամիջոցներ. Հնդկաստանը Հայաստանին զենք է մատակարարում Իրանի միջոցով
ՎԵՐԼՈՒԾՈՒԹՅՈՒՆՆԵՐ
News.ru-ն գրում է, որ ըստ ադրբեջանական լրատվամիջոցների Հնդկաստանը Հայաստանին զենք է մատակարարում Իրանի միջոցով։ Ադրբեջանական Caliber հրատարակությունը ձեռք է բերել կադրեր, որոնցում երևում է, թե ինչպես է Իսլամական Հանրապետությունից Նուրդուզ սահմանային անցակետով ավտոշարասյունը շարժվում դեպի Հայաստան։ Չնայած մեքենաների պարունակությունը պատված է բրեզենտով, բայց թերթը նշում է, որ տեղափոխվող բեռը ռազմական բնույթ է կրում։ Երկու անկախ աղբյուրներից ստացված մեր տվյալների համաձայն զենք ուղարկողը Հնդկաստանն է, որի հետ Հայաստանը վերջին շրջանում սրընթաց զարգացնում է ռազմատեխնիկական համագործակցությունը, գրել է Caliber-ը։ Հրատարակությունը հիշեցրել է, որ Երևանն ու Նյու Դելին նախկինում կնքել են ավելի քան 400 մլն դոլարի ռազմական պայմանագրեր, բացի այդ, վերջին շրջանում հաճախակիացել են շփումները կողմերի ռազմական գերատեսչությունների միջև։ Օրեր առաջ հայկական լրատվամիջոցները տեղեկություն էին տարածել, որ պաշտպանության նախարար Սուրեն Պապիկյանն ընդունել է Հնդկաստանի դեսպան Նիլակշի Սահա Սինհային, ում հետ քննարկել են ռազմական համագործակցության ամրապնդման հարցեր։ Հուլիսի 26-ին Ադրբեջանի նախագահի օգնական Հիքմեթ Հաջիևը կանչել է Բաքվում Հնդկաստանի դեսպան Սրիդարան Մադհուսուդխանանին և մտահոգություն հայտնել Երևանի և Նյու Դելիի միջև ռազմական համագործակցության խորացման կապակցությամբ։ Քաղաքական գործիչն ասել է, որ Հայաստանին զենքի մատակարարումը Բաքվի հետ խաղաղության համաձայնագրի բանակցություններին զուգահեռ ծառայում է այդ երկրի ռազմականացմանը և սպառնում է ողջ Հարավային Կովկասի անվտանգությանը։
հիշեցնենք, որ անցյալ տարվա աշնանը պայմանագիր էր ստորագրվել Հայաստանի կողմից հնդկական Pinaka բազմակի օգտագործման հրթիռային համակարգերի, Konkurs հակատանկային հրթիռային համակարգերի, 80 մմ-ոց ականանետների և այլ զինատեսակների գնման վերաբերյալ։ Բացի այդ, Երևանը դիտարկում է Նյու Դելիից հնդկական Tata Advanced Systems և Solar Industries ընկերությունների կողմից մշակված «Ակաշ» զենիթահրթիռային համակարգեր և կամիկաձե անօդաչու սարքեր ձեռք բերելու հնարավորությունը։
Դիտորդների կարծիքով Նյու Դելին պատրաստ է ռազմական օգնություն ցուցաբերել Երևանին, եթե Մոսկվան հանկարծ դադարեցնի կատարել իր պարտավորությունները այդ ոլորտում։ Հայաստանի վարչապետ Նիկոլ Փաշինյանը բազմիցս հայտարարել է, որ «որոշ դաշնակիցներ զենք չեն մատակարարում, թեև դրա համար միլիոնավոր դոլարներ են հատկացվել»։
Բացի դա անցյալ տարվա հոկտեմբերին Հայաստանի, Իրանի և Հնդկաստանի արտգործնախարարները հանդիպել և քննարկել են Պարսից ծոց-Սև ծով տրանսպորտային միջանցքի կառուցման հարցը։ Այդ երթուղին Հայաստանի տարածքով պետք է Իրանը կապի Եվրոպայի հետ։ Լրատվամիջոցները հայտնել են, որ այդ երթուղին անհրաժեշտ է նաև Հնդկաստանից Հայաստան զենք մատակարարելու համար։
Նյութը հրապարակման պատրաստեց Կամո Խաչիկյանը
