«Հուսահատության գազելները» և «Քաղպայմանագրի» թշվառությունը

Մինչ Հայաստանն Արցախի հետ միասին ցնցվում է պատերազմի հետևանքներից, սրտատրոփ սպասում, թե ինչ ճակատագիր է ունենալու նախօրեին Հակարիի կամուրջից առևանգված Վագիֆ Խաչատրյանը և արդեն 230 օրից ավելի պաշարման մեջ գտնվող Արցախի 120 հազար բնակչությունը, «Քաղաքացիական պայմանագիրը» շարունակում է ապրել, կարծես ոչինչ չի էլ եղել։

Երեկ Երևանի ամենաշքեղ սրահներից մեկում՝ «Դվին» հյուրանոցում, «Քաղպայմանագիրը» հերթական հանգանակություն-միջոցառումն է գումարել՝ փողեր հավաքելով Երևանի ավագանու ընտրություններին ընդառաջ։ Տարածքն ամբողջությամբ փակվել էր ոստիկանների կողմից, իսկ մի քանի հարյուր հյուրերը լսել են Փաշինյանի և մյուս ՔՊ-ականների ճառերը՝ ի դեպ ոչ մի բառ Արցախի ճակատագրի, կամ Հայաստանի խայտառակ իրավիճակի մասին։

Փաշինյանը կրկին հիշել է «հուսահատության գազելներն» ու «մահվան վերելակները», հայտարարել, թե իրենց ջանքերի գնով դրանք արդեն վերացվել են Երևանից։ Այն, որ «հուսահատության գազելներին» փոխարինել են հուսահատության տարիները, իսկ «մահվան վերելակների» փոխարեն, մահվան հովիտ է դարձել ամբողջ պետությունը, «Քաղպայմանագրին» բնականաբար չի էլ մտահոգում։

Ի դեպ, մեր տեղեկություններով, Փաշինյանը ներքին կարգով իր պատգամավորներին հրահանգել էր յուրաքանչյուրն առնվազն հինգ հյուր բերել, ընդ որում, հյուրերից յուրաքանչյուրը 20000-ական դրամ պիտի նվեր տար իշխող կուսակցությանը՝ դրամահավաքի անվան տակ։ Ըստ էության, նույնիսկ, սակայն, այդ գումարները բավարար չեն Երևանի անագանու ընտրություններում «Քաղպայմանագրի» մեծ ախորժակը բավարարելու համար, ուստի և այսպիսի հանգանակություններն իրականացվում են ավելի շուտ տարբեր օլիգարխներից և «նախկիններից» գումարներ գանձելու, դրանք ընտրությունների ժամանակ առանց վերահսկողության ծախսելու և Երևանի ավագանու ընտրություններում իրենց ցանկալի արդյունքը ցուցադրելու համար։ 

Արամ Բեգլարյան