Փաշինյանի հույսը տեսարաններն են. Սնուփ Դոգերով դեպի «պայծառ ապագա»

Հայաստանի կառավարությունը չի հայտնում, թե որքան գումար է հատկացրել սեպտեմբերի 23-ին ռեփեր Սնուփ Դոգգի համերգի համար։ Սոցիալական ցանցերում տարածվել են տեղեկություններ, թե համերգն արժենալու է 23 միլիոն դոլար։ Կառավարությունը տեղեկությունը հերքում է, խոստանում առաջիկայում հայտնել արված ծախսերը, սակայն որևէ կերպ չի նշում գումարի չափը։

44-օրյա պատերազմից հետո փաշինյանական իշխանությունն իրեն տվել է փառատոններին և տարատեսակ համերգներին, փորձելով տեսարաններով շեղել հանրության ուշադրությունը, Արցախում կատարվող ծայրաստիճան ծանր իրավիճակից և Արցախի խնդրից, այս կերպ տպավորություն ստեղծելով, թե՛ ներսում և թե՛ դրսում, թե Հայաստանի հասարակությունը հաշտ է Արցախը կորցնելու փաշինյանական դավաճնական քայլերի կապակցությամբ։

Հաջորդ տարի էլ վարչախումբը մի շարք այլ գերաստղերի է պատրաստվում բերել Հայաստան, մասնավորապես հայտնի է, որ 2024 թվականին Հայաստան է գալու Ջենիֆեր Լոպեսը և այդ համերգի համար էլ առնվազն 8 միլիոն դոլար են ծախսելու։ Նախորդ իշխանությունների օրոք էլ, երբ Արցախը հայկական էր, փառատոներ և համերգներ կազմակերպում էին, սակայն ոչ այնպիսի մասշտաբային և թանկարժեք, որքան գործող իշխանությունների օրոք։

Մի կողմից հայ հասարակությունը փորձում է միջազգային հանրությանը ապացուցել, որ իրավիճակն Արցախում ծայրաստիճան սրված է, իսկ Լաչինի միջանցքի փակման պատճառով 120 հազար հայեր գտնվում են ցեղասպանության եզրին, մյուս կողմից փաշինյանական իշխանությունը նման անբարո քայլերով ամեն ինչ անում է այդ տպավորությունը հողին հավասարեցնելու համար։ Ի դեպ ամենաանբարոյականն այս համերգի կազմակերպման մեջ այն է, որ այն տեղի է ունենալու 44-օրյա պատերազմի տարելիցից ընդամենը 4 օր առաջ։ Վստահաբար հազարավոր մարդիկ գնալու են այդ համերգին, լսեն, ուրախանան, սոցիալական ցանցերում տարածեն իրենց նկարներն ու տեսանյութերը և Ադրբեջանը հերթական հնարավորությունն է ստանալու միջազգային հանրությանն ապացուցելու, որ հայ ժողովուրդը բոլորովին էլ խնդիր չունի Արցախի օկուպացիայի հետ։ 

Անդրանիկ Նավասարդյան