ՔՊ-ն զավթում է նաև Ալավերդին

Մինչ քաղաքական կուսակցությունները պատրաստվում են ավագանու ընտրություններին, փաշինյանական վարչախումբը շարունակում է տարբեր համայնքներում, որտեղ նախկինում լուրջ պարտություն էր կրել, իշխանության բռնազավթման օպերացիաները։ Ախուրյանից հետո հաջորդը՝ թիրախում Ալավերդին է։

Նախորդ տարվա ընտրություններին «Քաղաքացիական պայմանագիրը» լուրջ պարտություն էր կրել «Ապրելու երկիր» կուսակցությունից։ «Ապրելու երկիրն» ու «Քաղաքացիական պայմանագիրը» միասին 10-ական մանդատ էին ստացել, իսկ Հայ Ազգային կոնգրեսի մեկ մանդատի շնորհիվ «Ապրելու երկիրը» կոալիցիա էր կազմել և կարողացել էր վերցնել իշխանությունն Ալավերդիում։

Այս ողջ ընթացքում «Ապրելու երկիրը» զգալի աշխատանքներ է իրականացրել այդ քաղաքում, բավականին մեծ և տեսանելի, թե՛ ազգաբնակչության և թե՛ ողջ Հայաստանի համար։ Իսկ նախօրեին, արդեն իսկ ակնհայտ դարձավ, որ «Քաղաքացիական պայմանագիրը» ձեռք չի քաշել Ալավերդին զավթելու իր մտադրությունից։ Տևական ժամանակ «Ապրելու երկրին» չէր հաջողվել ավագանու նիստ անցկացնել, ընդդիմադիր խմբակցությունն ու «Ապրելու երկրից» դուրս եկած մեկ անդամը չէին ներկայանում, իսկ օրեր առաջ համայնքապետ Արկադի Թամազյանի թիմակիցը՝ Սիմոն Զախարովը, հայտարարել է «Ապրելու երկիր» խմբակցությունը լքելու և որպես ավագանու անկախ անդամ հանդես գալու մասին։

Զախարովը հայտարարել է, թե գործող քաղաքապետի թիմն իր սրտով չէ և ցանկություն չունի աշխատելու նրա հետ։ Առայժմ պարզ չէ թիմից դուրս եկած Սիմոն Զախարովը կմիանա «Քաղաքացիական պայմանագրին», թե՝ ոչ։ Թե՛ ավագանու անդամը և թե՛ ՔՊ-ն հերքում են փոխադարձ պայմանավորվածությունների հնարավորությունը, Ալավերդիում, սակայն, վստահ են, որ գործող իշխանություններն ամեն ինչ անելու են հոկտեմբերին քաղաքը զավթելու։

Նշենք, որ գործող օրենսդրությամբ, գործող համայնքապետի պաշտոնավարման մեկ տարին ավարտվում է հոկտեմբերին և այդ ժամանակ էլ ավագանիում մեծամասնություն ունեցող ուժը հնարավորություն կունենա անվստահութուն հայտնելու նրան և նոր համայնքապետ ընտրելու։ Մեծ հավանականությամբ, «Քաղպայմանագիրը» հենց այդպես էլ կանի և արդեն հոկտեմբերից իր դրածոին կնշանակի Ալավերդու համայնքապետի պաշտոնում։

Ալինա Մամյան