«Մի բաժակ դավաճանություն. ինչպես գինու և կոնյակի արտոնյալ ներմուծումը դարձավ Կրեմլից քաղաքական կաշառք Վրաստանին ու Հայաստանին»
ՎԵՐԼՈՒԾՈՒԹՅՈՒՆՆԵՐ
Telegraf.com.ua-ն գրում է, որ Ռուսաստանի և Ուկրաինայի միջև պատերազմն անսպասելի անդրադարձ է ստացել գինու շուկայում։ Ռուսաստանի Դաշնության «Խաղողագործների ու գինեգործների միավորումը» նախաձեռնել է այսպես կոչված «անբարյացակամ երկրներից» գինու ներկրման համար 50% հատուկ տուրք սահմանելու օրենքի նախագիծ։ Այդ ցուցակը պաշտոնապես հաստատված է կառավարության կողմից և այսօր ներառում է 49 երկիր։ Բացի ԵՄ անդամ բոլոր երկրներից և ԱՄՆ-ից, իհարկե, այդ ցուցակում է նաև Ուկրաինան։
Միևնույն ժամանակ «Ուկրվինպրոմի» նախաձեռնությամբ Ուկրաինայի կառավարությունն աշխատում է Վրաստանից և Հայաստանից գինու, կոնյակի և ֆերմենտացված այլ ըմպելիքների վրա հատուկ տուրքեր սահմանելու վրա։ Գուցե պատահաբար, բայց այդ հատուկ տուրքի չափը նույնպես դիտարկվում է 50%-ի մակարդակում։ «Մենք ուսումնասիրում ենք նման որոշման հնարավոր տնտեսական հետևանքները»,- telegraf.com-ին ասել է ագրարային քաղաքականության և պարենի նախարար Նիկոլայ Սոլսկին։
Չնայած այն հանգամանքին, որ այդ կովկասյան երկու երկրներից Ուկրաինա գինու ներմուծումը սահմանափակելու մասին կառավարության որոշման նախագծի վրա աշխատանքները դեռ նոր են սկսվել, «Ուկրվինպրոմի» գործադիր տնօրեն Վլադիմիր Կուչերենկոն համոզված է, որ հատուկ տուրքը մոտ ապագայում կսահմանվի։ Նրա խոսքով ոչ մի պաշտոնյա, ում հետ ինքը քննարկել է այդ գաղափարը դեմ չի եղել դրան։ «Բոլորի համար ակնհայտ է, որ Վրաստանի և Հայաստանի իշխանությունները Ռուսաստանի Դաշնության դաշնակիցներն են: Այդ երկրների ժողովուրդները բարեկամ են ուկրաինացիների հետ, բայց պետությունների ղեկավարները կախված են Կրեմլից: Գինու ներմուծման սահմանափակումը նրանց համար զգայուն կլինի և ցույց կտա Ուկրաինայի հաստատակամ դիրքորոշումը Կրեմլի կամակատարների նկատմամբ»,- հայտարարել է Կուչերենկոն:
Նյութը հրապարակման պատրաստեց Կամո Խաչիկյանը
