Ստեփանակերտի խիստ զգուշացումը Փաշինյանին

Պաշտոնական Ստեփանակերտը Հայաստանից պահանջում է հրաժարվել Արցախն Ադրբեջանի կազմում ճանաչելու մտահաղացումից և հարաբերությունների քաղաքական կարգավորման նման մոտեցումից։ Ստեփանակերտի Վերածննդի հրապարակում կայացած հանրահավաքում հայտարարել է Արցախի պետնախարար Գուրգեն Ներսիսյանը։ Նրա խոսքով՝ այդ մոտեցումն ունակ չէ ապահովելու տարածաշրջանում խաղաղությունը և Արցախի ժողովրդի արժանապատիվ գոյությունը, ավելին դա չի կարող երաշխավորել նույնիսկ Հայաստանի գոյությունը, որովհետև թուրք-ադրբեջանական տանդեմի խնդիրը ոչ թե Արցախն է, այլ ողջ հայ ժողովուրդն ու ազգային պետականությունը։

Արցախն անընդունելի է համարում Հայաստանի կողմից Ադրբեջանի տարածքային ամբողջականությունը ճանաչելու մասին հայտարարությունները։ Իսկ այդպիսի հայտարարություններով երեկ շուրջ հինգ ու կես ժամ Հայաստանի վարչապետի պաշտոնը զբաղեցնող Նիկոլ Փաշինյանը հանրությանը համոզում էր, թե ինքը ոչնչի հետ կապ չունի և միջազգային հանրությունը չի աջակցում Հայաստանին ու Արցախին։

Փաշինյանն այնքան իրարամերժ ու հակասական հայտարարություններ է արել մի ասուլիսի ժամանակ, որոնք բավարար կլինեին մի ողջ տարվա ընթացքում, ընդ որում որևէ հուսադրող բան այդպես էլ Հայաստանի վարչապետի պաշտոնը զբաղեցնող անձը չի ասել։ Ըստ էության, Փաշինյանը հանրությանը պատրաստում է հերթական ցավալի զիջումներին, ընդ որում տպավորություն է, թե ինքն իր մասով իր խնդիրը լուծել է, կարողացել է ուժային կենտրոններից համապատասխան անվտանգության երաշխիքներ ստանալ և ինչ–որ պահի նույնիսկ չի բացառում, որ առավոտյան զարթնենք և տեսնենք, թե Հայաստանը մնացել է առանց պետության ղեկավարի, վերցրել է իր ընտանիքը և հայդա...

Ողջ ասուլիսի ընթացքում Փաշինյանը փորձում էր խղճահարություն առաջացնել սեփական անձի նկատմամբ, հանրությանը համոզել, թե ինքը ոչնչի համար մեղավոր չէ, իբր ջանում է, սակայն ոչինչ չի ստացվում։ Նման պայմաններում ցանկացած իրեն հարգող պետության ղեկավար հրաժարական կտար և կթողներ պետության առջև ծառացած մարտահրավերների և խնդիրների լուծումն ավելի կարող ուժերին, սակայն, ի դեմս Փաշինյանի, նրա կողմնակիցների, գործ ունենք «կոկորդիլոսի արցունքներ թափող» արարածների հետ, որոնց միակ գաղափարը սեփական իշխանությունը հնարավորինս պահպանելն ու պետական գանձարանը գռփելն է։ Ոչ մի քայլ հանուն պետության, այս սկզբունքով է ապրում ողջ ՔՊ-ն։

Ալինա Մարգարյան