Թեհրանի հայոց թեմի նախաձեռնությունից պետք չէ ակնկալել Արցախի խնդրի լուծմանն ուղղված քայլեր․ կովկասագետ

«Թեհրանի հայոց թեմի նախաձեռնությունից պետք չէ ակնկալենք լրացուցիչ քայլեր՝ ուղղված Արցախի խնդրի լուծմանը, թեև, այս իրազեկումը պետք է արվեր նաև հայկական միջավայրում այս խնդիրը բարձրացնելու համար, սակայն այս քայլը պետք է արվի նաև Երևանում,- ԼՈՒՐԵՐ.com-ի հետ զրույցում այս տեսակետը հայտնեց կովկասագետ Հրանտ Միքայելյանը՝ անդրադառնալով Թեհրանի հայոց թեմի նախաձեռնությանը, թե այսօր և վաղը ժամը 12:00-ից Թեհրանում կղողանջեն հայոց եկեղեցիների զանգերը՝ հաջակցություն Արցախի  շրջափակված քույր-եղբայրների։

«Իրանի դիրքորոշումը այնպիսին է, որ իրենք առանձնապես չեն խառնվում հարևանների խնդիրներին և աջակցում են բոլոր պետությունների տարածքային ամբողջականությանը, հետևաբար, այստեղից շատ դժվար է ինչ-որ բան ակնկալել, սակայն, նույնիսկ այս պարագայում, գոնե հումանիտար ասպեկտների հարցում կարելի է տեսականորեն ինչ-որ գործողություններ ստեղծել և կատարել, բայց դա առանց Հայաստանի անմիջական մասնակցության  տեղի ունենալ չի կարող»,- ասաց Միքայելյանը։

Հրանտ Միքայելյանի խոսքով` ներկայիս իշխանությունների քաղաքականությունը միտված է նրան, որ Հայաստանը իր աշխարհաքաղաքական վեկտորը փոխի, մնացած ասպեկտները` ներքաղաքական, արտաքին քաղաքական, ներկայիս իշխանություններին չի հետաքրքրում․

«Հայաստանը ունի Արցախի համար պատասխանատվություն և հենց Հայաստանում վարվում է քաղաքականություն, որպեսզի ժողովուրդը չնկատի՝ ինչ է կատարվում Արցախում, արվում է ժողովրդին շեղելու համար»,- ասաց նա։

Լիլիթ Զալիբեկյան