ՔՊ-ն պատրաստում է իր ընտրական ցուցակը

Կենտրոնական ընտրական հանձնաժողովը հրապարակել է Երևանի ավագանու ընտրությունների ժամանակացույցը։ Ըստ այդմ, նախընտրական քարոզարշավի ժամանակահատվածը սահմանվել է օգոստոսի 23-ից սեպտեմբերի 15-ը։  Կուսակցությունները կարող են իրենց ցուցակներն առաջադրել օգոստոսի 3-ից 13-ը, իսկ 13-ից 18-ը տեղի է ունենալու նրանց գրանցումը։

Այս օրերին հնարավոր բոլոր մասնակիցները փորձում են ճշտել իրենց հնարավորությունները, ինչպես նաև ցուցակ կազմելու շանսերը։ Բանն այն է, որ մի շարք կուսակցություններ, որոնք հայտարարել են, թե մասնակցելու են, կարող են խնդիրներ ունենալ։ Օրենքը պահանջում է՝ յուրաքանչյուր երրորդ թեկնածուն կին լինի և մի շարք կուսակցություններ կարող են խնդիրների բախվել այդ առումով։

Երեկ նաև մամուլում տեղեկություն հայտնվեց, թե «Քաղաքացիական պայմանագրում» արդեն սկսել են Երևանի ավագանու ընտրացուցակ կազմելու գործընթացը և առայժմ կարողացել են որոշում կայացնել առաջին հնգյակի մասով։ Ավինյանից հետո ցուցակում երկրորդ համարը կլինի Արմեն Փամբուխչյանը, որը Երևանի ավագանու ընտրություններին ղեկավարելու է ՔՊ նախընտրական շտաբը։ Երրորդ համարը գործող ավագանու ամենասկանդալային կերպարներից մեկն է՝ Նուարդ Վարդանյանը, չորրորդը՝ քաղաքապետի ներկայիս պաշտանակատար և առաջին տեղակալ Լևոն Հովհաննիսյանն է, հնգերորդը՝ ավագանու ՔՊ խմբակցության ղեկավար Արմեն Գալջյանը, իսկ ցուցակն ամբողջությամբ կկազմվի առաջիկայում, երբ մայրաքաղաքի տարածքային կառույցները ցանկերը ներկայացնեն վարչություն։ Ընդ որում, ի տարբերություն այլ քաղաքական ուժերի, որոնք իրենց ցուցակում տարբեր մարդկանց անունը գրելու համար խնդրելու, համոզելու են, Քաղպայմանագիրն այդ առումով որևէ խնդիր չունի։

Մեր աղբյուրի փոխանցմամբ՝ թաղապետարանների և ուսումնական հաստատությունների բազմաթիվ ղեկավարների առաջարկվել է իրենց անունը գրել ավագանու ցուցակում, ընդ որում նախապես զգուշացրել են, որ բոլորից ստորագրություն են վերցնելու, հարկ եղած դեպքում և ավագանի անցնելու դեպքում նրանց մանդատները վայր դնելու և այլ թեկնածուներին փոխանցելու հարցում։

Արևիկ Մելիքյան