Մոսկվայի և Բաքվի հարաբերություններում պայթունավտանգ իրավիճակ է. Կոմերսանտ

Մոսկվայի և Բաքվի հարաբերություններում պայթունավտանգ իրավիճակ է։ Ռուսական «Կոմերսանտ» պարբերականն է արձանագրել, որ Լեռնային Ղարաբաղի լիակատար պաշարման պայմաններում Մոսկվան և Բաքուն սկսում են կոշտացնել փոխադարձ հռետորաբանությունը։

Նախօրեին Մոսկվայում Ադրբեջանի դեսպանին հրավիրել են Ռուսաստանի ԱԳՆ, իսկ Բաքվում Ռուսաստանի դեսպանին փոխադարձ՝ Ադրբեջանի ԱԳՆ, ընդ որում երկու դեպքում էլ կողմերը շարունակել են պնդել իրենց հայտարարությունները։

Հուլիսի 15-ին Ռուսաստանը բավականին կոշտ հայտարարություն էր արել Հայաստանի իշխանություններին՝ մեղադրելուց զատ նաև պահանջել բացել Լաչինի միջանցքը և կատարել եռակողմ պայմանավորվածությունները։ Ադրբեջանից արձագանքել էին չափազանց կոշտ և լկտի տոնով՝ նշելով, թե հայտարարությունը չի բխում երկու երկրների միջև 2021 թվականի փետրվարին ստորագրված դաշնակցային համաձայնագրից։

Ըստ «Կոմերսանտի»՝ երկու երկրների միջև դիավանագիտական այս բանավեճը գուցե և ճգնաժամի նշույլներ չստանար, եթե հուլիսի 16-ին աղմկալի հայտարարությունով հանդես չգար Ադրբեջանի խորհրդարանի՝ ֆորմալ առումով ընդդիմադիր, իրականում իշախնությունների հետ սերտ կապեր ունեցող պատգամավոր Գուդրատ Գասան Գուլիևը։ Նա վիրավորական արտահայտություններ է հնչեցրել Մոսկվայի հասցեին՝ Ռուսաստանն անվանելով անվստահելի և արնախում երկիր՝ պահանջելով դուրս բերել Ղարաբաղում տեղակայված ռուս խաղաղապահներին և պնդելով, թե ռուսական կողմը չի ցանկանում, որպեսզի հայերի և ադրբեջանցիների միջև խաղաղությունը հաստատվի։

Այս հայտարարությունները հարուցել են Մոսկվայի զարմանքն ու, միևնույն ժամանակ վրդովմունքը և ընդհուպ մինչև Ռուսաստանի դաշնային խորհրդից կոշտ արձագանքներ են հնչել։ Ադրբեջանն, ըստ էության, փորձելով օգտվել Ռուսաստանի թուլացումից, ձգտում է հանել նրան տարածաշրջանից՝ դրա համար կանգ չառնելով ոչնչի առջև։

Արա Մելիքսեթյան