Փաշինյանն՝ ադրբեջանական նարատիվների առաջամարտիկ
ՎԵՐԼՈՒԾՈՒԹՅՈՒՆՆԵՐ
Բրյուսելում Հայաստանի, Ադրբեջանի և Եվրոպական խորհրդի նախագահների հանդիպման մանրամասներին առանձնապես անդրադառնալու կարիք չկա, ամեն ինչ ասվում է այդ հանդիպման պաշտոնական կարճ տեսանյութը, որտեղ Շառլ Միշելն ու Իլհամ Ալիևը ժպտում են, իսկ Նիկոլ Փաշինյանի դեմքից միայն տխրություն է թափվում։ Ինչպես և սպասելի էր եռակողմ այդ հանդիպումն անցել է ադրբեջանական պահանջների ծիրում և նույնիսկ հանդիպումից հետո Եվրոպական խորհրդի նախագահ Շառլ Միշելի հայտարարություններն ամբողջովին ներծծված էին ադրբեջանական նարատիվներով։
Միշելը մամուլի կարճ ասուլիսում կարևոր է համարել Աղդամով հումանիտար մատակարարումներ իրականացնելու Ադրբեջանի պատրաստակամությունը, միաժամանակ շեշտել, թե Արցախը Հայաստանին կապող Լաչինի ճանապարհը պետք է բացվի։
Օրերս Ադրբեջանի արտգործնախարար Ջեյհուն Բայրամովն Ադրբեջանում «Կարմիր խաչի» ներկայացուցչության ղեկավարի հետ հանդիպմանն ասել էր, թե Ղարաբաղի հայերի կարիքները բավարարելու համար Բաքուն չի բացառում Աղդամ-Ստեփանակերտ ճանապարհով օգնություն ցուցաբերելու հնարավորությունը։
«Ես շեշտել եմ, որ անհարժեշտ է բացել Լաչինի ճանապարհը, նաև ընդգծել եմ Աղդամով հումանիտար մատակարարումներ իրականացնելու Ադրբեջանի պատրաստակամությունը, ես երկու տարբերակն էլ կարևոր եմ համարում, կոչ եմ անում երկու կողմին էլ իրականացնել հումանիտար մատակարարումներ, որպեսզի տեղի բնակչության կարիքները բավարարվեն», - ասել է Միշելը։
Աղդամով որևէ բեռնափոխադրում իրականացնելու հնարավորությունն Արցախից արդեն իսկ մերժել են, հստակ է, որ նման «հումանիտար օգնության» դեպքում Արցախն ամբողջությամբ կհայտնվի Ադրբեջանի վերահսկողության տակ և լիակատար կախվածության մեջ կընկնի, ինչը թերևս հենց Նիկոլ Փաշինյանի և Իլհամ Ալիևի մտահաղացումն է։
Արցախում այս օրերին իրավիճակն արդեն օրհասական է դարձել և հանրահավաքների շարք է սկսվել։ Արցախի նախագահն էլ նամակ է գրել եվրոպական կառույցներին և Նիկոլ Փաշինյանին ներկայացնելով իրավիճակը։
Ըստ էության, Հավաքական Արևմուտքն առաջ է մղում Ադրբեջանի շահերը հանուն նավթի և գազի մատակարարների և բացառապես շարժվում ադրբեջանական նարատիվներով, իսկ Հայաստանի գործող վարչախումբն էլ ամեն կերպ օգնում է նրանց իրականացնել այս հակահայկական քաղաքականությունը։
Անի Ավետիսյան
