Վիտալի Բալասանյանին մեկուսացրել են արցախյան զարգացումներից

Արցախի անվտանգության խորհրդի նախկին քարտուղար, Արցախի ազգային հերոս Վիտալի Բալասանյանին երեկ մեկուսարանից տեղափոխել են հիվանդանոց, սրտի հետ կապված խնդիրների համար։ Բալասանյանին նախօրեին էին ձերբակալել։

Արցախում համաժողովրդական շարժում սկսելու հայտարարություններից ժամեր անց հայտնի դարձավ, որ անվտանգության խորհրդի նախկին քարտուղարի որդուն և ազգականին ձերբակալել են, ընդ որում, եթե որդու դեպքում նշվում էր, որ քրեական գործը հարուցվել է 74,5 միլիոն դրամ վարկային միջոցներն ոչ նպատակային ծախսելու համար, ապա Վիտալի Բալասանյանի դեմ քրեական գործը հարուցվել էր իշխանության ներկայացուցչի նկատմամբ բռնության հոդվածով։

Ըստ իշխանությունների՝ իբր տան խուզարկության ժամանակ, Վիտալի Բալասանյանը հարձակվել է ԱԱԾ աշխատակիցների վրա, քաշքշել, հարվածներ հասցրել։ Սովորական, ստանդարտ «գործսարքոցի» է և հենց խուզարկությունն ու դիմակավորված շոուն էլ առիթ են դարձել տանից ոչ միայն Վիտալի Բալասանյանի որդուն ձերբակալելու, այլ նաև հենց նրան։

Հարցաքննությունից հետո էլ Վիտալի Բալասանյանի որդուն ու ազգականին ազատ են արձակել, իսկ անվտանգության խորհրդի նախկին քարտուղարին կալանավորել են, ինչը վկայում է, որ այս գործողությունն իրականում ուղղված է եղել հենց գեներալի դեմ։

Հատկապես Արցախում ներքաղաքական իրավիճակի սրման պայմաններում Փաշինյանը մտավախություն ուներ, որ Բալասանյանը կարող է իր հեղինակությամբ ճնշել Արայիկ Հարությունյանին և Փաշինյանի այլ կամակատարների և ընթացող գործընթացները տանել այլ՝ ոչ իրենց ձեռնտու հունով։ Իզուր չէ, որ երեկ սկսված համաժողովրդավարական շարժման ժամանակ հանրահավաքում հայտարարեցին, թե այս շարժումն ապաքաղաքական է։ Ամենաքաղաքական շարժումն ապաքաղաքական հայտարարելով՝ պարզապես ծաղրում էին Արցախի բնակիչներին և փորձում բրյուսելյան հանդիպումից առաջ ընդամենը պայքարի իմիտացիա ստեղծել։

Կարապետ Բաբլոյան