Արցախում փորձում են սրել ներքաղաքական իրավիճակը
ՎԵՐԼՈՒԾՈՒԹՅՈՒՆՆԵՐ
Մինչ Արցախը գտնվում էր լիակատար և տոտալ շրջափակման մեջ, իսկ Ադրբեջանն էլ օրեցօր ուժգնացնում է հրադադարի խախտումներն Արցախի ուղղությամբ, Արցախի նախագահ Արայիկ Հարությունյանը փորձում է սրել ներքաղաքական իրավիճակը՝ հերթական անգամ իրեն ցանկալի քաղաքական դիվիդենտներ շահելու համար։
Երեկ Արցախում բավական բազմամարդ երթ է տեղի ունեցել, երթի մասնակիցներն Արցախում ոչ անհայտ «Հեղափոխական» կուսակցության նախագահ Օսիպյանի գլխավորությամբ շարժվել են դեպի կառավարություն, հանդիպում պահանջել պետքարտուղար Գուրգեն Ներսիսյանի հետ և պահանջել պարտադրել ռուս խաղաղապահներին ապահովել Լաչինի միջանցքով երթևեկությունը դեպի Արցախ, ինչպես նաև բեռների տեղափոխումը։ Ներսիսյանը միայն խնդրել է մեկ-երկու օր համբերել, որպեսզի կարողանա բանակցել համապատասխան կողմերի հետ։
Իհարկե՝ որևէ կերպ Ադրբեջանը չի բացելու Լաչինի միջանցքն Արցախի բնակիչների համար, ինչը նշանակում է, որ անդամները մեկ-երկու օրից Արցախում կոնկրետ կփորձեն սրել իրավիճակն, այն ուժերը, որոնք սերտ առնչություն ունեն Հայաստանի գործող վարչախմբի հետ։
Երեկ մեկ այլ տեղեկություն էլ տարածել է Արցախի նախագահին կից հակաճգնաժամային խորհրդի նախագահ Տիգրան Պետրոսյանը, ով ևս համարվում է Փաշինյանի դրածոն։ Նա նշել է, թե ապրիլյան պատերազմին օգնություն ուղարկած ծխախոտները Ստեփանակերտում 550-600 դրամով վաճառքի են հանել։ «Տեղյակ եմ ամբողջ այս շղթային, սկսած ուղարկողից, ավարտած իրացնողից, տեղյակ են նաև համապատասխան մարմինները, տեսնենք վերջը ինչ են անում»,- ֆեյսբուքում գրել է Պետրոսյանը։
Ըստ էության առանց այն էլ սոցիալական ծանր վիճակում գտնվող Արցախում նման հայտարարությունները, որոնք դեռ չեն հաստատավել իրավապահների կողմից, կարող են խուճապ և բացասական տրամադրություններ առաջացնել, ուստի և, եթե Արայիկ Հարությունյանի նշանակած անձը ցանկանում էր խնդրին լուծում տալ խուճապ տարածելու փոխարեն, կարող էր դիմել իրավապահներին։
Ի դեպ իրավապահների մասին. Արցախում վերջին օրերին տեղեկություններ են տարածվում ներքին գործերի նախարարի հրահանգով մի լրագրողի ծեծի ենթարկելու մասին։ Ճիշտ է դա, թե սխալ, առայժմ չենք կարող հաստատել, սակայն փաստն այն է, որ Արցախում համախմբման և միասնականության ջանքերի փոխարեն ավելի շուտ փորձում են պառակտում մտցնել։
Նելլի Բեգլարյան
