Ի՞նչ է քննարկում ԱԽ քարտուղարը ԱՄՆ-ում

Հայաստանի անվտանգության խորհրդի քարտուղար Արմեն Գրիգորյանը երեկ հանդիպել է ԱՄՆ-ի էներգետիկայի դեպարտամենտի միջուկային էներգետիկայի գծով քարտուղարի տեղակալ Քեթրին Հաաֆֆի հետ։ Ըստ ԱԽՔ մամուլի ծառայության՝ կողմերը քննարկել են ոլորտում երկկողմ հետաքրքրություն ներկայացնող հարցեր և նախանշել համագործակցության հնարավոր ուղիները։

Գրիգորյանն աշխատանքային այցով Միացյալ Նահանգների մայրաքաղաքում է հուլիսի 4-ից։ Նա արդեն հանդիպել է ԱՄՆ ազգային անվտանգության հարցերով խորհրդական Ջեյք Սալիվանի, պետքարտուղարի եվրոպական և եվրասիական հարցերով տեղակալի պաշտոնակատար Դերեք Հոգանի, առևտրի դեպարտամենտի արտահանման կառավարման գծով քարտուղարի օգնական Թեա Քենդերի և ԱՄՆ պաշտպանության նախարարի փոխտեղակալ Լորա Կուպերի հետ։

Ընդամենը 9 օրում անվտանգության խորհրդի գրասենյակը միայն 5 հանդիպումների մասին է տեղեկացրել, բնավ չնշելով, թե մնացած ողջ ժամանակն ինչով է զբաղված Արմեն Գրիգորյանը։ Մեր տեղեկություններով՝ նա ամենևին էլ զբաղված չէ մայրաքաղաք Վաշինգտոնի տեսարժան վայրերն ուսումնասիրելով, այլ այս օրերին ակտիվ հանդիպումներ է ունենում տարբեր շրջանակների հետ՝ փորձելով շոշափել նրանց տրամադրությունները Հայաստանի արտաքին քաղաքական վեկտորը փոխելու իր և իր անմիջական ղեկավար Փաշինյանի մտադրությունների հարցում։

Ի դեպ, մեր աղբյուրի փոխանցմամբ, Գրիգորյանը նաև ակտիվորեն քննարկում է Հայաստանում ամերիկյան մոդուլային ատոմակայաններ կառուցելու հարցը։ Փաշինյանի ստեղծած աշխատանքային խումբն առավել հակված է Ռուսաստանի տարբերակին, մոտ 800 մեգավատանոց նոր ռեակտոր կառուցելու վերաբերյալ, սակայն Փաշինյանն ու իր սորոսական ենթականերն ամեն ինչ անում են ռուսական կողմի առաջարկը խափանելու և փոխարենը Միացյալ Նահանգներից առնվազն երկու մոդուլային ռեակտորներ բերելու։ Դրանք երկուսը միասին կունենան նույնքան հզորություն՝ 800 մեգավատ։ Խնդիրն ամենևին էլ էներգետիկ չէ, այլ ավելի շուտ քաղաքական, և Միացյալ Նահանգներն ատոմակայան փոխանցելու հարցն օգտագործում է Ռուսաստանին Հարավկովկասյան տարածաշրջանից դուրս մղելու և Հայաստանում Ռուսաստանի էներգետիկ հզորությունները խլելու նպատակով։

Մարիետա Սաֆարյան