Ո՞վ է կանգնած ԲԴԽ ապօրինությունների թիկունքում

Բարձրագույն դատական խորհրդում և դատական համակարգում բոլոր ապօրինի գործընթացներն որ իրականացնում են գործող վարչախումբն ընդդեմ անկախ դատավորների, արվում են ոչ թե Կարեն Անդրեասյանի անմիջական նախաձեռնությամբ, այլ Նիկոլ Փաշինյանի մի մերձավոր անձի անմիջական քավորությամբ, ում մինչ օրս հաջողվում է մնալ ստվերում և «հաջողությամբ» իրականացնել դատական անկախ համակարգը՝ քաղաքական իշխանության ոտքերի տակ գցելու հատուկ գործողությունը։

Իհարկե, բոլոր գործողություններն իրականացվում են ԲԴԽ գործող նախագահ Կարեն Անդրեասյանի անմիջական ջանքերով, հենց նա է ապահովում դրանց ընթացքը, թեև ոչ այնքան պրոֆեսիոնալիզմով և պարբերաբար հայտնվում է անհեթեթ իրավիճակներում։

Անդրեասյանն այս առումով ընդամենը բութ գործիք է, ով նաև անձնական խնդիրներ ունի դատական համակարգի հետ։ Դեռևս մարդու իրավունքների պաշտպան եղած ժամանակներից նրա և դատավորների ջրերը մեկ առվով չէին հոսում և դատավորներն էլ փոխադարձ ատելությամբ էին պատասխանում Կարեն Անդրեասյանին։ Եվ այսօր նա ընդամենը վրեժ է լուծում անկախ դատավորներից։

Մեր աղբյուրների փոխանցմամբ՝ իրականում դատարանների դեմ ողջ բոլոր գործողությունները համակարգում է մեկ մարդ, ոչ անհայտ Զարեհ Սարգսյանը։ Վերջինս Ազգային ժողովի պատգամավոր, «Շիշ բռնող» մականունով Հայկ Սարգսյանի և Նիկոլ Փաշինյանի օգնական Նաիրի Սարգսյանի հայրն է։ Չափազանց մտերիմ հարաբերություններ ունի վարչապետի ընտանիքի հետ և վարչախմբի բոլոր նուրբ, առանձնահատուկ մոտեցում պահանջող պատվերներն արվում են Զարեհ Սարգսյանի ձեռամբ։

Այս անձը հայտնի է նրանով, որ դեռևս Քոչարյանի օրոք կոռուպցիայի և խոշոր գումարների հափշտակության հոդվածով մի քանի ամիս անցկացրել էր ազատազրկման վայրերում, իսկ հեղափոխությունից հետո արդեն առաջին գծում է, թեև անձամբ պաշտոն չի վարում, սակայն հաջողացրել է որդիներին բավականին լուրջ պաշտոնների նշանակել, ինքն էլ այսօր դարձել է դատարանների կուռատորը, և ոչ միայն քաղաքական, այլ նաև կոռուպցիոն ֆինանսական բոլոր պատվերները տրվում են Զարեհ Սարգսյանի միջոցով։

Նիկոլ Փաշինյանի հետ անձամբ ինքն է հարաբերվում՝ նրանից ստանալով հնարավոր բոլոր պատվերներն, ի դեպ դա վերաբերում է նաև առանձին անհատների ապօրինի գույքի բռնագանձման դատաքննություններին։

Մեր աղբյուրի փոխանցմամբ՝ Զարեհ Սարգսյանն ինքն իրեն էլ չի մոռանում այս գործողությունների ընթացքում և դատական համակարգի ապօրինի համակարգումն իրականացնում է բնավ էլ ոչ անշահախնդրորեն։ 

Թեհմինե Մարգարյան