ՔՊ-ն չի հաշտվում ՏԻՄ-երում պարտության հետ

ՏԻՄ ընտրություններից ամիսներ անց էլ «Քաղաքացիական պայմանագիր» կուսակցությունը չի կարողանում հաշտվել մի շարք համայնքներում իր կրած պարտության հետ և ամեն ինչ անում է կրկին իշխանությունն այդ համայնքներում զավթելու ուղղությամբ։ «Քաղաքացիական պայմանագիրն», ըստ ամենայնի, առաջիկայում կվերցնի իշխանությունը Շիրակի մարզի Ախուրյան խոշորացված համայնքում։ 2021 թվականի ընտրությունների արդյունքում ՔՊ-ն ամենաշատ թվով ձայներն էր հավաքել, բայց ի վերջո չէր կարողացել համայնքի ղեկավար ընտրել։ «Ախուրյան» և «Հայաստան» դաշինքները միավորվելով համայնքապետ էին ընտրել իրենց թեկնածու Արծրուն Իգիթյանին, ով 26 տարի ղեկավարում էր համայնքը։

Վերջին շրջանում իշխանությունը զգալի սաստկացրել էր ճնշումը 2 խմբակցությունների վրա՝ փորձելով գոնե առնվազն ավագանու մեկ անդամի պարտադրել անցնել «Քաղպայմանագրի» կողմը։ Օրերս ընդդիմադիր «Ախուրյան» դաշինքի անդամներից մեկը վայր է դրել իր մանդատն, իսկ նրան փոխարինած Արիստակես Չաբարյանը դուրս է եկել ընդդիմադիր թիմից ու միացել «Քաղաքացիական պայմանագրին», ինչը բավարար է, որպեսզի ՔՊ-ն անվստահություն հայտնի գործող քաղաքապետին և իր թեկնածուին նշանակի այդ պաշտոնում։ «Քաղպայմանագիրը» նաև չի կարողանում հաշտվել Ալավերդիում իր կրած պարտությունից, երբ 1 քվեի տարբերությամբ Ալավերդու քաղաքապետ դարձավ «Ապրելու երկիր» կուսակցության ներկայացուցիչ Արկադի Թամազյանը։ Նրա դեմ իշխանությունը քրեական վարույթ է հարուցել, մեղադրում են ինչ-ինչ չարաշահումների մեջ։

«Ապրելու երկիր» կուսակցության համահիմնադիր Մեսրոպ Առաքելյանի խոսքով՝ տեղական իշխանությունները, մարզպետարանն ամեն կերպ ճնշումներ են գործադրում Ալավերդու ընդդիմադիր քաղաքապետի վրա, հորդորում են հրաժարական տալ, հակառակ դեպքում ստուգումներ, քրեական գործեր խոստանում։ Առաքելյանի խոսքով, եթե նման գործելաոճը շարունակվի, ապա փաստերը կներկայացվեն իրավապահներին։

Միևնույն ժամանակ փաստ է, որ Հայաստանի բոլոր իրավապահ կառույցները վաղուց դարձել են Նիկոլ Փաշինյանի կցորդները և հենց իրենք էլ ջանքեր են գործադրում ընդդիմադիրներին ճնշելու ուղղությամբ և չի բացառվում, որ Ալավերդիում էլ, ի վերջո, գործող իշխանություններին հաջողվի քաղաքապետի պաշտոնը խլել «Ապրելու երկրից»։

Գայանե Բարսեղյան