Հայ-ադրբեջանական սահմանին հրետակոծությունը զրկել է ռուսական երկաթուղու շահագործողին օգուտներից
ՎԵՐԼՈՒԾՈՒԹՅՈՒՆՆԵՐ
Eadaily.com–ը գրում է, որ «Հարավկովկասյան երկաթուղի» ՓԲԸ-ն մտադիր չէ կրճատել անձնակազմը Սոթքի հանքավայրի պարբերական գնդակոծությունների հետ կապված առաջացած դժվարությունների պատճառով։ Այս մասին մամուլի ասուլիսում հայտարարել է «Հարավկովկասյան երկաթուղի» ՓԲԸ-ի գլխավոր տնօրեն Ալեքսեյ Մելնիկովը։
Ավելի վաղ հայտնի էր դարձել, որ ռուսական «GeoProMining» ընկերությունը դադարեցրել է Սոթքի հանքավայրի բաց եղանակով շահագործումը (գտնվում է ՀՀ Գեղարքունիքի մարզում, Ադրբեջանի հետ սահմանին), ինչի կապակցությամբ Սոթքի կայարանից ոսկու հանքաքարի փոխադրումը դեպի Արարատ կայան դադարեցվել է (Սոթքի հանքավայրի հանքաքարը հարստացվում է Արարատի ոսկու կորզման կոմբինատում, մինչև մաքուր ոսկու կիսաֆաբրիկատի վիճակի)։
«Մենք GeoProMining-ի մեր գործընկերների հետ աշխատել և աշխատում ենք Սոթքի կայարանից Արարատի կայարան ոսկու հանքաքարի տեղափոխման վրա։ Մի շարք օբյեկտիվ պատճառներով այս տարի՝ մայիսից, այդ փոխադրումները դադարեցվել են։ Դա բավականին լուրջ խնդիր է մեզ համար, մենք մեր առջև խնդիր ենք դրել պահպանել թիմը, չենք պատրաստվում դրա հետ կապված կադրեր կրճատել։ Ստիպված եղանք որոշակի միջոցների դիմել՝ կապված կես դրույքով աշխատանքի ռեժիմի հետ». – բացատրել է Մելնիկովը:
Նրա խոսքով, Սոթքի հատվածն անմիջականորեն սպասարկող թիմի մի մասը ( երեք հազար աշխատակիցներից մոտ 60-ը) տեղափոխվել է 2/3 շահագործման ռեժիմի։ Ոմանք հրավիրվել են տեղափոխվել Երևան։ Որոշ աշխատակիցներ համաձայնել են, մնացածը շարունակում են մնալ հեռակա։
Մելնիկովն ընդգծել է, որ «Սոթք» - «Արարատ» երթուղիով ոսկու հանքաքարի փոխադրումն երկաթուղով փոխադրվող ապրանքների ընդհանուր ծավալի 48%-ն է կազմել։ Ըստ կանխատեսումների տարեկան համատեքստում կլինի մինուս բյուջե, ընկերությունը կաշխատի վնասով։ Այդ իսկ պատճառով երկաթուղային օպերատորը քայլեր է ձեռնարկում բեռնափոխադրումների ավելացման ուղղությամբ, մասնավորապես որոշ ապրանքներ ավտոմոբիլային տրանսպորտից երկաթուղայինին փոխադրելու տեսքով։
Այս տարվա պլյուսների թվում է Հայաստանի և ԵՄ երկրների միջև առևտրի աճն, ինչի պատճառով ավելացել է կոնտեյներային բեռնափոխադրությունը, որի մի մասը գնում է երկաթուղով։ Դա հավելյալ ծավալ է, որը թույլ է տալիս ընկերությանը մասամբ փոխհատուցել «նվազած եկամուտն», ասել է ընկերության գործադիր տնօրենը։
«Հարավկովկասյան երկաթուղի» ՓԲԸ-ն «Ռուսական երկաթուղիներ» ԲԲԸ դուստր ձեռնարկությունն է և իրականացնում է հայկական երկաթուղու կոնցեսիոն կառավարումը։ Հայաստանի երկաթուղային ենթակառուցվածքը նրա կառավարմանն է հանձնվել 2008 թվականի փետրվարի 13-ին ստորագրված պայմանագրի համաձայն։ Կոնցեսիոն կառավարման ժամկետը 30 տարի է՝ ևս 10 տարով երկարաձգելու իրավունքով։
Նյութը հրապարակման պատրաստեց Կամո Խաչիկյանը
