ՔՊ-ն գրոհելու է սոցցանցերը՝ Երևանի ընտրություններից առաջ

«Քաղաքացիական պայմանագիր» կուսակցությունը լայն թափով պատրաստվում է Երևանի ավագանու ընտրություններին և այդ ճանապարհին մտադիր է օգտագործել հնարավոր բոլոր ռեսուրսներն՝ այդ թվում վարչական։

Նաև, մեր աղբյուրների փոխանցմամբ՝ Փաշինյանն անձամբ «Քաղպայմանագրին» և քարոզչական թիմերին հրահանգել է առավելագույնս ուշադիր լինել սոցիալական ցանցերի նկատմամբ։ Մասնավորապես արագ հայտնաբերել Քաղպայմանագրի և Երևանի ավագանու ընտրություններում իրենց թեկնածուի դեմ սոցիալական ցանցերում տարածվող բոլոր արատավորող տեղեկությունները, կանխել դրանք, հնարավորության դեպքում պետական մարմինների և կուսակիցների միջոցով արգելափակել ընդդիմադիր տրամադրված և սոցցանցերում ակտիվ օգտատերերին։

Մեր աղբյուրը նշեց, որ այս գործում հատկապես կարևորագույն առավելությունը դրված է այսպես կոչված ֆեյքերի ֆաբրիկաների վրա, որոնք հիմանականում ամենաշատն են լինում ֆեյսբուքում և այլ սոցցանցերում, նաև կարողանում են գրոհներ կազմակերպել, ընդ որում, որպեսզի այդ ավելի նշանակալի լինեն և ընդդիամադիր օգտատիրոջը հնարավոր լինի արգելափակել, հատուկ չաթեր ստեղծել նաև «Քաղպայմանագրի» պատգամավորների և առավել մտերիմ կուսակից պաշտոնյաների մասնակցությամբ նրանց ևս ներգրավել ընդդիմախոսներին լռեցնելու պայքարին։

Այն, որ փաշինյանական վարչախմբի ներկայացուցիչներն իրենց բուն աշխատանքն անելու փոխարեն հատկապես զբաղված են սոցիալական ցանցերով, որևէ մեկը չի կասկածում։ Իր իշխանությունը սոցցանցերի միջոցով զավթած Փաշինյանը, հրաշալի հասկանում է դրանց դերն ու նշանակությունը և հատկապես հիմա, երբ Երևանի ավագանու ընտրությունները կարող են կենաց մահու պայքար դառնալ գործող վարչախմբի համար, նրանք հրաշալի գիտակցում են։ 

Ընդդիմությունն այս իրավիճակում առնվազն գոնե պետք է սոցիալական ցանցերում համախմբվի և միահամուռ կերպով պայքարի իշխանության ֆեյքերի դեմ։ Ի դեպ, հրահանգվել է նաև ակտիվացնել գաղտնալսման տարբեր ծրագրեր, այդ թվում՝ «Պեգասուսը», հնարավորինս ընդդիմախոսներին վարկաբեկելու նպատակով։

Սաթենիկ Ղազարյան