Պրիգոժինի խռովությունն ավարտվեց, բայց դեռ երկար կցնցի Ռուսաստանը

Ռուսաստանում «Վագներ» ռազմական խմբավորման մեկօրյա խռովությունն ավարտվեց, ավարտվեց առանց առերևույթ վտանգավոր հետևանքների։ Ռուսաստանի իշխանություններին հաջողվեց համաձայնության գալ Եվգենի Պրիգոժինի հետ, ընդ որում բանակցությունները վարել էր Բելառուսի նախագահ Ալեքսանդր Լուկաշենկոն, ուստի և Պրիգոժինն ընդունել է Լուկաշենկոյի առաջարկը Ռուսաստանի տարածքում «Վագների» շարժը դադարեցնելու և դեէսկալացիայի հետագա քայլերի վերաբերյալ։

Ինքը՝ Պրիգոժինը տեղափոխվելու է Բելառուս, իսկ նրա խմբավորման մարտիկների դեմ քրեական վարույթներ չեն հարուցվելու։ Թե ինչի հանգեցրեց այս մեկօրյա ձախողված խռովությունն, առայժմ վաղ է ասել։ Ցանկացած պարագայում բավականին լուրջ իմիջային կորուստ էր Ռուսաստանի գործող իշխանությունների համար։ «Վագների» հիմնադիրը պահանջում էր աշխատանքից հեռացնել և պատժել Ռուսաստանի պաշտպանության նախարար Սերգեյ Շոյգուին և գլխավոր շտաբի պետ Գերասիմովին։

Արևմտյան մի շարք աղբյուրների փոխանցմամբ՝ Պրիգոժինի հետ գաղտնի համաձայնությունը նաև գաղտնի կետեր է պարունակել, որոնցից ամենակարևորը հենց Շոյգուին և Գերասիմովին զբաղեցրած պաշտոններից հեռացնելն ու նրանց փոխարեն այլ անձ նշանակելն է։

Ռուսական էլիտայում հակասությունների մասին շատ վաղուց էին խոսում, հատկապես ուկրաինական ճակատում անհաջողությունների մեկնարկից հետո, և բազմաթիվ վերլուծաբաններ չեն բացառում, որ Պրիգոժինի «խռովությունն» էլ հենց կազմակերպվել էր Պուտինի կողմից՝ ցույց տալու ռուսական բանակի իրական վիճակը և այդ ֆոնի վրա թուլացնել ու հեռացնել Շոյգուին և Գերասիմովին։ «Վագների» մարտիկներին հաջողվել էր կարճ ընթացքում հասնել Մոսկվայի մատույցներ, իսկ բանակը պարզապես անուժ էր գտնվել որևէ կերպ այդ շարժը կանգնեցնելու հարցում։

Ռուսական խռովության առանցքային դրվագներից մեկն էլ Ռուսաստանին դաշնակից երկրների վերաբերմունքն էր։ Նշենք՝ Պուտինն անձամբ է զրուցել Ղազախստանի, Ղրղստանի, Բելառուսի նախագահների, Հայաստանի վարչապետի պաշտոնը զբաղեցնող Նիկոլ Փաշինյանի հետ։ Եթե Լուկաշենկոն անվերապահ աջակցել է Ռուսաստանին, ապա թե՛ Ղազախստանը, թե՛ Ղրղստանը և թե՛ Հայաստանը պարզապես ձեռքները լվացել էին։

Նիկոլ Փաշինյանը հեռախոսազրույցի ընթացքում հայտարարել էր, որ չնայած Ռուսաստանում ծավալվող իրադարձությունները Ռուսաստանի ներքին գործն է, կցանկանար տեղեկություններ ստանալ բարեկամ երկրում հաստատված իրադրության վերաբերյալ։ Սա ոչ այլ ինչ է, քան ծաղր Ռուսաստանի նախագահի հասցեին։ Թե ինչ հետևանքներ դա կունենա Փաշինյանի համար, դեռևս վաղ է արձանագրել։ 

Անի Մախսուդյան