Ֆրանսիան հանդես է եկել հայտարարությամբ Երասխում ադրբեջանցիների կողմից գործարանը գնդակոծելու առիթով

Ֆրանսիան ափսոսանք է հայտնել զինված միջադեպերի առիթով, որոնք տեղի են ունեցել վերջին 48 ժամում Հայաստանի եւ Ադրբեջանի միջեւ սահմանի մի քանի կետերում, ներառյալ Հայաստանի տարածքում՝ Երասխում քաղաքացիական անձանց գնդակոծությունը։ Երկիրը զսպվածության, լիցքաթափման եւ քաղաքացիական բնակչության պաշտպանության կոչ է արել։ Այս մասին նշվել է Ֆրանսիայի ԱԳՆ հայտարարությունում։

«Ֆրանսիան նորից հայտարարում է, որ աջակցում է Միջազգային դատարանի 2023թ. փետրվարի 22-ի որոշման կատարմանը (Լաչինի- խմբ.) միջանցքում երթեւեկության վերականգնման մասին։

Ֆրանսիան  հավատարիմ է խաղաղության վերադառնալուն՝ ի բարօրություն տարածաշրջանի ամբողջ բնակչության։ Հայաստանի եւ Ադրբեջանի միջեւ բանակցությունները վերջերս շարունակվել են բարձր մակարդակով Քիշնեւում, հունիսի 1-ին, Եվրոպական քաղաքական ընկերակցության գագաթաժողովի շրջանակում։ Ադրբեջանի նախագահ Իլհամ Ալիեւը եւ Հայաստանի վարչապետ Նիկոլ Փաշինյանը բանակցություններ են վարել Ֆրանսիայի Հանրապետության նախագահի, Գերմանիայի կանցլեր Օլաֆ Շոլցի եւ Եվրոպական խորհրդի նախագահ Շառլ Միշելի հետ։ Այդ հանդիպումը ցուցադրել է քննարկվող տարբեր հարցերի շուրջ առաջընթացի հասնելու ցանկությունը, այդ հարցերը պետք է լուծվեն բացառապես բանակցությունների ճանապարհով։

Եվրոպայի եւ արտաքին գործերի գծով նախարար Քատրին Կոլոնան ապրիլին այցելել է Հայաստան եւ Ադրբեջան, որպեսզի օգնի երկու երկրներին առաջ ընթանալ խաղաղության համաձայնագրի հարցում։ Այդ ջանքերը նախաձեռնվում են Եվրամիության եւ Միացյալ Նահանգների հետ սերտ կոորդինացմամբ»,- նշվել է Ֆրանսիայի ԱԳՆ հայտարարությունում։