Համեստ ուսուցիչը կտրուկ բարելավել է իր ֆինանսական դրությունը
ՎԵՐԼՈՒԾՈՒԹՅՈՒՆՆԵՐ
2018 թվականի իշխանափոխությունից հետո դրական փոփոխություններ զգում են միայն Նիկոլ Փաշինյանի կողմնակիցները։ Մարդիկ, ովքեր տարբեր գարեջրատներում պարտքով գարեջուր էին խմում, սեփական կենսագրություն և աշխատանքային փորձառություն չէին ունեցել, այսօր, օրըստօրե հարստանում են։
Պաշտպանության նախարար Սուրեն Պապիկյանը հրապարակել է իր 2022 թվականի հայտարարագիրը։ Նախորդ տարի Պապիկյանը նվեր է ստացել 19 միլիոն 750 հազար դրամ, 22 հազար դոլար և 13 հազար 400 եվրո գումար։ Գումարի տեսքով նվերները նախարարը ստացել է նույն տարում, երբ ամուսնացել է, երեխա ունեցել։ Ենթադրաբար ընտանեկան իրադարձություններն են նվերների առիթներ դարձել։ Թեպետ, նշենք, որ որևէ ուրիշ շարքային քաղաքացու երբեք նման նվերներ չեն տա։
Սուրեն Պապիկյանի հայտարարգրում նշվում է շուկայականից անհամեմատ գնով Երևանի կենտրոնում գնած բնակարանի գործարքի մասին, որն իրականացվել է 2022 թվականին։ «Բյուրեղ» բնակելի համալիրում բնակարան գնելու նպատակով Սուրեն Պապիկյանը Հայ էկոնոմ բանկից 65 միլիոն դրամ վարկ է վերցրել։ «Հետքը» ամիսներ առաջ պարզել էր, որ նորակառույց շենքում գտնվող բնակարանը 165 քմ է, իսկ գործարքի գինը 69 միլիոն դրամ է։
Ըստ էության, ժամանակին Երևանի քաղաքապետարանում փորձագետի և դպրոցի ուսուցչի աշխատանք կատարող, համեստ կենսակերպ վարող Պապիկյանը վերածվել է մանր ֆեոդալի և կտրուկ քայլերով գնում է դեպի նորօրյա օլիգարխ դառնալու ճանապարհով։
Փաշինյանական իշխանությունը որևէ կերպ չի սանձում իր ներկայացուցիչներին, ընդհակառակը՝ Պապիկյանը միայնակ չէ, շատերն են, որ հսկայական գումարներ են նվեր ստանում, բարելավում իրենց կենցաղային պայմանները, հիփոթեքով կամ «քեշ» փողով բնակարաններ գնում, հանգստանում արտերկրում։
Ի դեպ, քաղաքակիրթ երկրներում խոշոր նվերները ընդհանրապես օրենքով հանձնում են պետությանը։ Հայաստանում նման բան ոչ կլինի, ոչ էլ կարելի է ակնկալել։ Թղթերով միգուցե ամեն ինչ նորմալ է, սակայն Սուրեն Պապիկյանի հայտարարագիրը վկայում է, որ Հայաստանում հաջողության հասնելու համար պետք է անձնվիրաբար ծառայել վարչախմբի պարագլխին, կատարել նրա բոլոր հրահանգները, կիսել երկիրը խայտառակ պարտության հասցնելու պատասխանատվությունը։
Սոնա Բեգլարյան
