ՀՀ սահմանը հատելուց ցանկացած մեքենա պիտի հանդիպի ՀՀ-ն ներկայացնող սահմանապահին. Եղոյանը՝ Մեղրիի ճանապարհի մասին
ՔԱՂԱՔԱԿԱՆՈՒԹՅՈՒՆ
Դուք գիտեք, որ հայ-իրանական սահմանի երկայնքով կան ռուսական սահմանապահ զորքերի ուղեկալներ, նաև՝ Մեղրիի մաքսակետում: Այս մասին այսօր՝ հունիսի 13-ին, ԱԺ-ում լրագրողների հետ զրույցում հայտարարեց Եվրոպական ինտեգրման հարցերի մշտական հանձնաժողովի նախագահ, ՔՊ-ական պատգամավոր Արման Եղոյանը՝ պատասխանելով հարցին, թե ճանապարհների ապաշրջափակումից հետո արդյոք Ադրբեջանը Նախիջևանին միացնող ճանապարհը վերահսկելու են ռուս սահմանապահները, ինչպես գրված է նոյեմբերի 9-ի եռակողմ հայտարարության 9-րդ կետում:
«Այստեղ երկու հարց պետք է իրարից տարանջատենք՝ ՀՀ իրավազորության տակ գտնվող ճանապա՞րհ, թե՞ ՀՀ իրավազորությունից դուրս գործող ճանապարհ: Հայաստանը հայտարարել է, որ իր իրավազորությունից այսինքն յուրիսդիկցիայից դուրս ճանապարհներ Հայաստանանում չեն լինելու,-ասաց Եղոյանը:
Նա հվելեց, որ եռակողմ հայտարարության մեջ նշված ճանապարհի հսկողությունն այլ է, քանի որ Մեղրիի անցակետում, ինչպես օրինակ, Զվարթնոց օդանավակայանում հսկողությունն իրականացնում են ռուս սահմանապահները:
«Բայց ՌԴ սահմանապահ զորքերը գործում են ՀՀ-ի իրավազորության ներքո, այնտեղ կարող է լինել հայ սահմանապահ: Այստեղ մեխն այն է, որ այդ ճանապարհը պետք է լինի ՀՀ-ի իրավազորության ներքո: ՀՀ-ի սահմանը հատելուց ցանկացած օտարերկրյա ավտոմեքենա պիտի հանդիպի ՀՀ-ն ներկայացնող սահմանապահին»,-ասաց Եղոյանը:
Մեկնաբանելով հարցը, թե ի՞նչ է նշանակում հայտարարության մեջ գրված Մեղրիով անցնող ճանապարհը հսկելու են ՌԴ սահմանապահ զորքերը՝ Եղոյանն ասաց, որ այն կարող է վերաբերել ճանապարհի, բեռների անվտանգությանը. «Ամեն դեպքերում Հայաստանի և Ադրբեջանի միջև դեռ չկա փոխվստահության այն մակարդակը, որը կա այլ պետությունների հետ: Բեռնափոխադրումների նկատմամբ վերահսկողությունը անվտանգության միջոցառումների նկատմամբ վերահսկողությունը պետք չէ անպայմանորեն բերել միացնել այն հարցի հետ, թե սահմանին ո՞ր պետությունը ներկայացնող, կամ ազգության սահմանապահ է նստած»,-մեկնաբանեց Արման Եղոյանը:
