Փաշինյանի վարկանիշը գահավիժում է

Հայաստանյան հասարակության մեջ գործող վարչախմբի վարկանիշը գնալով գահավիժում է։ «Գելափ ինտերնեյշընըլ» ասոցիացիան հրապարակել է իր վերջին հարցման արդյունքները և հարցին, թե արդյոք անհրաժեշտ է իրականացնել արտահերթ խորնրդարանական ընտրություններ և ձևավորել նոր կառավարություն, միանշանակ անհրաժեշտ է, պատասխանել է 41%-ը, ևս 11,9 %-ը պատասխանել է, որ ավելի շուտ անհրաժեշտ են արտահերթ խորհրդարանական ընտրությունները։

Փաստացի հանրության մեծամասնությունը՝ մոտ 60 %-ը, անհրաժեշտ են համարում արտահերթ խորհրդարանական ընտրությունների անցկացումը։ Գնահատելով վարչապետի պաշտոնը զբաղեցնող Նիկոլ Փաշինյանի գործելաոճը՝ ընդհանրապես  բացասական  պատասխան է տվել հարցվածների   47,1 %-ը, ևս 24,2 %-ը ավելի շուտ բացասական պատասխանն է տվել։ Եվ փաստացի հանրության 71,3 %-ը բացասական է գնահատում Նիկոլ Փաշինյանի աշխատանքը։

Քաղաքացիների 63,4 %-ը միանշանակ բացասական, իսկ 18, 5 %-ը ավելի շուտ բացասական է համարում Փաշինյանի՝ Ադրբեջանի 86600 կմ2 տարածքային ամբողջականության ճանաչման հայտարարությունը։ Փաշինյանն այդ կերպ Լեռնային Ղարաբաղը ներառել էր Ադրբեջանի տարածքում։ Ուշագրավ մեկ այլ հարցի՝ հնարավո՞ր է Լեռնային Ղարաբաղի հայության գոյատևումը Ադրբեջանի կազմում որպես ազգային փոքրամասնություն, հարցման մասնակիցների 77,7 %-ը պատասխանել է, որ ընդհանրապես հնարավոր չէ, ևս 8,7 %-ն էլ ավելի շուտ պատասխանել է՝ ավելի շուտ հնարավոր չէ։

Բոլոր այս հարցումները վկայում են, որ հանրությունը վաղուց այլևս հույս չի կապում Նիկոլ Փաշինյանի հետ, իսկ նրա և իր թիմի վարկանիշը գահավիժում է։ Ցավալին այս իրավիճակում այն է, որ չկա համապատասխան ընդդիմադիր միավոր, որը կկարողանար Փաշինյանին հեռացնել երկրի ղեկից, և Հայաստանը դուրս բերել անդունդից, ուր նրան նետել են գործող ապիկար իշխանությունները։ Ըստ էության, ամեն ինչ վկայում է, որ գոյություն ունի իշխանափոխության հանրային լայն պահանջ, սակայն չկա այն քաղաքական ուժը, որը կձևակերպի այդ պահանջը և իրական քայլերով կհասնի իշխանափոխության։

Նունե Բայրամյան