Փաշինյանի աղմկահարույց հայտարարությունից անցել է երկու տարի. գերիները դեռ Բաքվում են

Ուղիղ երկու տարի առաջ խորհրդարանական արտահերթ ընտրությունների քարոզարշավի ժամանակ Նիկոլ Փաշինյանը ռազմագերիների վերաբերյալ մի հայտարարություն էր արել, որը տևական քննադատությունների տեղիք էր տվել։ «Այդ տղաները Բաքվի բանտերում պայքարում են ՀՀ անկախության և ինքնիշխանության համար, նրանք մեզ կներեն 1-2 ամիս ավելի բանտերում մնալու համար, բայց չեն ների , եթե հանուն իրենց ազատության զիջենք մեր երկրի անկախությունը»,- ասել էր Փաշինյանը՝ հավելելով, թե գերիների խնդիրը փորձում են Հայաստանի դեմ և հայ ժողովրդի դեմ օգտագործել անհամաչափ զիջումներ պարտադրելու համար։

Այս հայտարարությունից անցել է 2 տարի, սակայն Բաքվի բանտերում գտնվող հայ ռազմագերիների թիվը ոչ թե նվազել է, այլ շարունակում է ավելանալ։ Ադրբեջանը բոլոր հնարավորություններն օգտագործում է նոր զինծառայողների գերի վերցնելու և ռազմագերիների հարցը Հայաստանի դեմ օգտագործելու համար։

Նույնիսկ շաբաթներ առաջ Բրյուսելում Եվրոպական միության խորհրդի նախագահ Շառլ Միշելի հայտարարությունից տևական ժամանակ անց ռազմագերիների հարցում որևէ առաջընթաց չկա։ Պաշտոնական տվյալներով Ադրբեջանում 33 գերի կա, սակայն հայ իրավապաշտպանները անհերքելի ապացույցներ ունեն, որ առնվազն 80 անձ է պահվում բանտերում, և Փաշինյանը, որը 2 ամիս էր խոստանում այդ տղաներին, 2 տարի անց էլ որևէ հիմնավոր քայլ չի արել հայ ռազմագերիների կյանքը թեթևացնելու, նրանց հայրենիք վերադարձնելու համար։

Ըստ էության ռազմագերիների խնդիրը գործող իշխանությունների համար ընդամենը առիթ էր սեփական իշխանությունը երկարաձգելու, իսկ այսօր արդեն այդ մարդիկ գլխացավանք են դարձել Նիկոլ Փաշինյանի իշխանության համար։ Բնականաբար հանրությունը անընդհատ փորձելու է դավաճան վարչախմբին պարտադրել քայլեր ձեռնարկել, կամ էլ անընդհատ հարցեր է տալու։ Իզուր չէ, որ գործող իշխանությունների տարատեսակ ներկայացուցիչներն ամեն գնով խուսափու են խոսել ռազմագերիների մասին, իսկ տխրահռչակ հայտարարությունից երկու տարի անց կարելի է փաստել, որ Նիկոլ Փաշինյանն ինքն է ամեն ինչ անում, որ հայ ռազմագերիներին Ադրբեջանը չվերադարձնի։

Գինեվարդ Պողոսյան