Արևմտյան նախազգուշացում Փաշինյանին. պատժամիջոցներ կարող են լինել

Օրերս Մոլդովայի մայրաքաղաք Քիշնևում կայացած եվրոպական գագաթնաժողովին Նիկոլ Փաշինյանը մասնակցել է ոչ միայն գագաթնաժողովի աշխատանքներին, հնգակողմ հանդիպում ունեցել Ադրբեջանի նախագահի, Ֆրանսիայի և Գերմանիայի ղեկավարների հետ, այլ նաև մի շարք ուշագրավ հանդիպումներ է ունեցել, որոնց մասին հայկական կողմն այդպես էլ չի հայտնել։

Մեր տեղեկություններով՝ Փաշինյանին մասնավորապես լուրջ հարցեր են տրվել Ռուսաստանի դեմ պատժամիջոցները շրջանցելու վերաբերյալ։ Բավականին լուրջ խոսկցության ընթացքում Փաշինյանին նոր թվեր են ներկայացրել, որ Հայաստանի տնտեսական աճը ոչ թե մեր երկրի ներքին ռեսուրսների հաշվին է, այլ զուգահեռ ներմուծման և ՌԴ արտահանման։ Արևմուտքին հատկապես տարօրինակ էր թվացել Մոսկվայում ՌԴ նախագահ Վլադիմիր Պուտինի հայտարարությունը, թե ԵԱՏՄ երկրները չեն կարողանում հասնել Հայաստանի տնտեսական աճի հետևից։ Եվ ոչ միայն եվրոպական կառույցները, այլ նաև ամերիկյան ֆինանսական հետախուզությունը ապացույցներ են ներկայացրել, թե ինչ է Արևմուտքից ներմուծվում Հայաստան և ինչ է արտահանվում Ռուսաստան։

Ընդ որում այդ ապրանքների մեջ կան այնպիսիները, որոնք երբեք Հայաստան չեն ներմուծվել և դրանց ներմուծումը շեշտակի աճել է Ուկրաինա Ռուսաստանի ներխուժումից հետո, այդ թվում՝ տեխնոլոգիաներ, սարքավորումներ։ Արևմուտքն այս կերպ հասկացրել է Փաշինայնին, որ իրենք հրաշալի գիտակցում են, թե ինչ է անում Հայաստանը, ինչպես է շրջանցում պատժամիջոցները և աջակցում Ռուսաստանին։ Չափազանց կոշտ խոսակցության ընթացքում Փաշինյանին հասկացրել են, որ սա լուրջ նախազգուշացում է, և Հայաստանը ընդհուպ կարող է հայտնվել արևմտյան պատժամիջոցների տակ։

Այս կապակցությամբ նաև ուշադրություն են հրավիրել որոշ ժամանակ առաջ Իտալիայում հայտնաբերված կոկայինի մեծ խմբաքանակի վրա։ Նախազգուշացրել, որ կարող են Հայաստանը հայտարարել թմրաթրաֆի երկիր՝ դրանից բխող բոլոր հետևանքներով։

Բոլորովին էլ տարօրինակ չէ, որ գրեթե նույն ժամանակ հրապարակվեց չեխական հեռուստաընկերությանը Նիկոլ Փաշինյանի տված հարցազրույցը, որտեղ նա առանձնահատուկ հայտարարեց, թե Հայաստանը ուկրաինական պատերազմում Ռուսաստանի դաշնակիցը չէ, այս կերպ Փաշինյանը փորձում էր քծնել Արևմուտքին, համոզել՝ Հայաստանի և անձամբ իր դեմ պատժամիջոցներ չկիրառել։

Գուրգեն Պապյան